17/10/08

La Xunta pola Defensa la Llingua acusa al Gobiernu d'Asturies y a la radio y televisión públiques de nun cumplir les lleis.



La Xunta pola Defensa de la Llingua Asturiana denunció güei públicamente "l'incumplimientu sistemáticu que la Radiotelevisión del Principáu d'Asturies (RTPA) fai de los decretos de toponimia oficial cuando, como ente públicu que ye, tenía que ser un mediu fundamental pa llevar a la práutica tolos alcuerdos y normatives aprobaes pol Gobiernu asturianu". "Ye vergoñoso", señala la organización, "ver cómo, depués de que 32 conceyos tengan la so toponimia oficializada y publicada nel BOPA, l'ente públicu de comunicación nun faiga casu d'ello y siga usando topónimos que yá nun tienen validez llegal", añadió.

Al traviés d'un comunicáu, la Xunta recuerda lo qu'afiten los decretos de toponimia aprobaos pol Conseyu de Gobiernu: "el so usu ye d'obligáu cumplimientu per parte de l'alministración pública". "Nun hai más vueltes que-y dar. Tanto la RTPA como'l Gobiernu asturianu tán actuando illegalmente no tocante a la toponimia oficializada", añadió la nota.

Refierse asina a aquellos casos d'usu nel ente públicu de topónimos que yá nun tienen validez llegal y que nos nuevos decretos quedaron sustituyíos pol términu tradicional, reconocíu agora como oficial.

Según la Xunta, "Asturies ye la única comunidá con llingua propia onde los medios de comunicación públicos nun emiten nel so idioma, con tolo qu'ello podía valir pa normalizar una llingua que ta a puntu de desapaecer si nun se tomen midíes urxentes y bien planificaes". "Ta claro que los intereses del Gobiernu asturianu van per otru llau: el de marxinar la llingua asturiana", añadió.

El casu de la toponimia, pa esti colectivu ye un "bon exemplu: apruébense los decretos pa dempués nun los cumplir". "La radio y la televisión que paguen tolos asturianos y asturianes tien que respetar la llei y usar les formes toponímiques que son oficiales en tola so programación, tanto nel so usu oral como escritu", acaba'l testu.