La Xunta Moza entamó güei nel campus universitariu d'El Milán n'Uviéu, una aición dientro d'una nueva campaña que tien como finxu la inclusión del asturianu nos planes d'estudios universitarios como títulu de grau.
Tamién dio anuncia nun comunicáu, qu'esta va ser la primera d'una riestra de movilizaciones na defensa de la llingua propia d'Asturies y el so posicionamientu sol rangu qu'esta tien que tener nos nuevos planes d'estudiu na Universidá d'Uviéu, y que nun pue ser otru que'l de "títulu de grau o maior", lo mesmo que toles otres llingües del Estáu.
Sigún apaez nel comunicáu fechu públicu pola Xunta Moza "el marcu académicu européu nuevu nun pue valir como sida p'arrequexar l'asturianu nuna categoría menor".
Dempués de sorrayar que la Facultá de Filoloxía ya aprebó nel añu 1996 una llicenciatura de Filoloxía Asturiana, la Xunta Moza camienta que la Universidá d'Uviéu, como institución cultural cimera de la sociedá asturiana "nun pue ser cómpliz de la marxinación y l'amenorgamientu que carez l'asturianu".
Facía asina referencia al resultáu de la votación que'l cursu pasáu refugó los estudios d'asturianu a propuesta del profesor Fernández de Castro y que, sigún el mesmu ponente afitó nos medios de comunicación, espeyaba más de cálter políticu que académicu, ya que mecía les consideraciones científiques y llingüístiques cola oficialidá de la llingua y con plantegamientos nidiamente políticos como la regulación de les llingües en delles comunidaes autónomes y los supuestos problemes sociales surdíos, sigún el so paecer, d'esti ordenamientu llegal, postulándose d'esta traza nes postures más estremamente reaicionaries de la sociedá española y sospechosamente a l'amparu del aparatu del PP y del PSOE n'Asturies, cuyos representantes, y esti ye tamién un casu d'esceición en tol Estáu, planteguen el derechu a la llingua propia, a la llibre eleición y a la identidá, como rotura de la convivencia, obligación y hasta en dellos casos oyose falar, dende dalgún qu'otru escañu de la Xunta Xeneral, de violencia y separatismu.
La Xunta Moza va siguir na xera pola"inclusión del asturianu como un títulu de grau a sabiendes de que p'algamalo nun hai más que materializar les bones pallabres y los xestos, tornándolos nuna realidá concreta na que la llingua propia d'Asturies tenga el sitiu que merez".
