L'Axencia de Noticies Europa Press da cuenta de la espantada de Gutiérrez Granda del so cargu'n La Llaboral y fáilo na forma que vien darréu:
Gutiérrez Granda renuncia al so cargu en La Llaboral "dolíu" col presidente del Principáu.
"Nun toi pa ocupar un puestu nun chiringu y cobrar una cantidá" dixo l'ex director de Deportes propuestu pa xestionar el teatru.
Daniel Gutiérrez Granda, ex director xeneral de Deportes del Principáu, y la persona que foi propuesta al entamu d'esta llexislatura pa encargase de la coordinación y programación del teatru de La Llaboral fizo güei la so pública renuncia al cargu. Nuna rueda de prensa en Xixón, Gutiérrez Granda dixo tar "dolíu" col xefe del Executivu asturianu, Vicente Álvarez Areces, con quien recordó que trabayó demientres los últimos 20 años.
Gutiérrez Granda aseguró que, per parte del Principáu, ofrecióse-y un "contratu d'alta dirección 'kafkianu'" con un "continuu control per parte del viceconseyeru, Jorge Fernández León, y del xerente de la entidá 'Recrea' que xestiona'l teatru".
Na so comparecencia nos medios, Granda repasó los fechos dende que nel mes de xunetu'l presidente del Principáu púnxose en contactu con él per teléfonu pa propone-y asumir el nuevu cargu. "Díxome que diba ser el viceconseyeru, Jorge Fernández León, la persona que se diba poner en contactu conmigu pa comunicámelo", aseguró.
Esti añadió que, naquel momentu, propúnxose asumir el cargu con ilusión y recordó, nesti sentíu, la so esperiencia, na xestión cultural demientres tiempu al frente del Teatru Xovellanos, na xestión y n'actividaes vinculaes anterioremente a La Llaboral. Los problemes surdieron, según dixo, cuando se propunxo asumir el cargu. "A finales d'agostu enteréme de que ya existía otra persona y otra empresa pa facer el trabayu qu'a mí se m'encomendara, y que yeren Mateo Feijoo y Recrea".
Por ello, Granda aseguró que nun diba firmar el contratu que se-y propunxo. "Nun puedo firmar esi contratu d'alta dirección nin asumir esa responsabilidá porque toi en política pa trabayar, pa facer coses y non pa ocupar un puestu nun chiringuitu y cobrar una cantidá, porque nun me presta nin me paez serio", dixo.
L'ex director xeneral insistió na so decepción col xefe del Executivu, con quien nun pudo falar "nos últimos dos meses", pese a insistir "per teléfonu y email". Esplicó que faló también cola actual Conseyera de Cultura, y col viceconseyeru, quienes nun-y "esclariaron nada".
Granda comentó que cuando se dispunxo a incorporase al so puestu tenía un proyectu de programación y la idea de coordinar el teatru de La Llaboral colos d'Uviéu, Xixón y Avilés. "L'espaciu de la Llaboral ye pontentísimu, pero pienso que se tien de facer una programación pa los asturianos, non una programación elitista, porque l'elitismu pol elitismu nun va a nenguna parte". De la mesma manera, mostró la so confianza en que la programación del teatru, que s'inaugura n'ochobre, "se reconduza y se meyore", y espresó los sos más bonos deseos pa esti proyectu.
L'ex responsable rexonal va incorporase nos próximos díes al so antiguu puestu n'Arcelor-Mittal, porque en La Llaboral "nin va llegar nin se-y espera".
