El maxistráu del Xulgáu Contenciosu Alministrativu númberu 3 d'Uviéu va plantegar al Tribunal Constitucional que se pronuncie sobre la posible "inconstitucionalidá" del artículu 4.2 de la Llei 1/1998 d'Usu y Promoción del Bable/Asturianu.
El pidimientu básase no dispuestu nel artículu, en cuantes que diz que "va tenese por válidu a tolos efectos del usu del bable/asturianu nes comunicaciones orales o escrites de los ciudadanos col Principáu d'Asturies", según l'autu al que tuvo accesu Europa Press. De la mesma manera, la parte dispositiva señala qu'escontra esti autu nun cabe la interposición de recursu dalgún.
L'autu del xuez forma parte del procesu del recursu concentiosu alministrativu que presentó'l lletráu del Serviciu Xurídicu de l'Alministración del Principáu d'Asturies, Xurde Blanco Puente, el 19 de marzu del 2007 escontra la resolución de la Conseyería de Presidencia del 6 de marzu que refugaba dar cursu oficial a un permisu solicitáu por ésti y redactáu en llingua asturiana. El recursu almitiólu'l 22 de marzu.
L'Alministración autonómica apoyaba la so negativa en que l'artículu 4.2 de la Llei sólo contempla les comunicaciones orales o escrites de los ciudadanos d'Asturies "ensin facer mención espresa a los asuntos que, en relación al serviciu, planteguen los funcionarios de l'Alministración na so condición de tales".
Blanco Puete, pela so parte, alegó que l'Alministración tien que tramitar el so permisu en tanto que ye d'un "ciudadanu funcionariu" al amparu del artículu 4.2 de la Llei d'Usu y Promoción. Amás, apoyó'l so pidimientu invocando, ente otros testos, la 'Carta europea de les llingües rexonales y minoritaries' y la 'Declaración universal de los Derechos Humanos'.
El maxistráu sometía a consideración de les partes y del Ministeriu Fiscal el posible plantegamientu d'una "cuestión d'incostitucionalidá" de los artículos 2, 4 y 7 de la Llei d'Usu y Promoción del Bable/Asturianu.
Según l'autu, Xurde Blanco opúnxose al posible plantegamientu de la cuestión d'inconstitucionalidá mediante escritos del 29 de xunu y del 30 de xunetu. Per parte'l Ministeriu Fiscal nun se formularon alegaciones. La defensa del Principáu d'Asturies, al traviés d'un escritu del 2 de xunetu, alegó que'l bable/asturianu "nun ye oficial" na comunidá, "lo qu'únicamente podría facer l'Estatu d'Autonomía pela vía del artículu 3 de la Constitución Española, ensin que la existencia d'un órganu oficial de traducción vulnere la Constitución".
L'autu indica, en base a los fundamentos del Derechu, que pa que'l Xulgáu estimara'l motivu d'impugnación como vulneración del derechu, el procedimeintu tendría d'apoyase nel artículu, apuntando que "presenta visos d'inconstitucionalidá".
Por ello, sostién qu'en casu de considerase constitucional, l'artículu 4 de la Llei, nos términos en que se consideren "válides o eficaces" les comunicaciones que dirixen los alministraos en bable/asturianu ante l'Alministración, el fallu diba ser estimatoriu de la pretensión del recurrente (Xurde Blanco). De la mesma manera, nel casu de considerar incostitucinoal l'artículu por entender qu'establez una oficialidá del bable/asturianu, el fallu diba ser desestimatoriu de la pretensión del recurrente.
El xuez considera qu'existen preceptos constitucionales infrinxíos ya que la Constitución Española nun establez qu'una llei, llamada sólo a fomentar y protexer la llingua propia como bien cultural, introduza na so regulación elementos característicos de cooficialidá.
Según el maxistráu, la previsión del artículu 4.2 de la Llei d'Usu y Promoción vien a establecer un réxime de "oficialidá carente del necesariu amparu estatutariu, pues l'Estatutu d'Autonomía del Principáu nun establez la Oficialidá".
Asina, tien de ser l'Estatutu, según marca l'artículu 3.2 de la Constitución, el que declare la cooficialidá del asturianu, y posteriormente, "el llexislador autonómicu va poder desarrollar al traviés de les sos lleis y reglamentos l'alcance y efectos del núcleu sustancia de la oficialidá".
