7/9/07

Areces compara la defensa de la identidá col independentismu y la irracionalidá



Nunes alloriantes declaraciones feches a la cadena SER, el Presidente'l Principáu d'Asturies Alberto Alvarez Areces, fizo una vegada más estes declaraciones que tanto-y presten y qu'en cuenta de facer gala del so españolismu más cutre y descomanáu, compara, ensín rubor dengún, la defensa de la identidá de les Comunides Autónomes col independentismu, saltando asina penriba del Títulu VIII de la Constitución y asitiándose na llende del sistema democráticu.


"Asturies nunca nun tuvo un conflictu identitariu, siéntese parte integrante d'España. Al mesmu tiempu desarrolló'l so autogobiernu d'una manera racional".


Sigún esto, pa Alvarez Areces, les Comunidaes Autónomes que fan defensa de la so identidá, de los sos símbolos, drechos, fueros, qu'oficialicen les sos llingües propies o que se nomen nacionalidaes nos sos estatutos de autonomía, (Cataluña, País Bascu, Comunidá Valenciana, Islles Baleares, Andalucía, Navarra, Aragón, Galicia, Canaries), nun se sienten parte integrante d'España y desarrollen el so autogobiernu d'una manera irracional.

El cansín discursu d'españolidá escluyente, radical y fartuca roña d'Alvarez Areces, ye recurrente en toles declaraciones que vien faciendo cuantayá y nun tien anguaño en tol Estáu, referente políticu dengún ; habría que treslladase a los tiempos nos que Fuerza Nueva yera un partíu políticu p'atopar daqué asemeyáo.

Areces asítiase testeronamente como ferviente rescatador del conceutu d'UNIDA DE DESTIN NO UNIVERSAL D'ESPAÑA Y LES SOS REXONES, acompangáu, eso sí, polos sos palmeros de la FSA-PSOE. ¡Que tiempos aquellos...!