El Tribunal Constitucional avala que la ciudadanía del Principáu d'Asturies pueda dirixise a l'Alministración n'asturianu de manera oral o por escritu. Un xulgáu d'Uviéu presentara una cuestión d'inconstitucionalidá a la principal llei de proteición de la llingua, la Llei d'Usu, dempués d'un recursu plantegáu por un lletráu al que nun-y acetaren una solicitú, escrita n'asturianu, pa un permisu de trabayu.
Los asturianos tienen el derechu de rellacionase cola Alministración pública del Principáu d'Asturies na llingua propia del país, l'asturianu. Asina lo decretó'l Tribunal Constitucional (TC) español, que refugó recién una cuestión d'inconstitucionalidá contra la llei de Promoción y Usu del Asturianu, la principal norma que protexe y regula esta llingua románica. Un xulgáu d'Uviéu presentara la cuestión al Constitucional dempués de qu'un lletráu d'Asturies, Xurde Blanco, presentara un recursu contra una resolución que -y denegaba la solicitú d'un permisu llaboral pol fechu de tar escrita en llingua asturiana.
La cuestión d'inconstitucionalidá plantegaba que la Llei d'Usu taba en contradicción con dellos artículos de la Constitución española, y pidía que se revisara. Pero'l Tribunal Constitucional del Estáu nun-y dio la razón al xulgáu d'Uviéu, y negó la discrecionalidad de l'Alministración autonómica d'acetar les comunicaciones que se reciban n'asturianu, ye dicir, que los organismos públicos de la comunidá autónoma tán obligaos a tramitar los escritos de los ciudadanos nesta llingua, y esto inclúi reconocer la so validez en cuanto a plazos.
El lletráu afectáu, Xurde Blanco, esplicó en declaraciones a Cope-Asturies recoyíes por Asturnews.com que "nun ye d'estrañar qu'el TC tíre-y de les oreyes a l'alministración, ya que l'asturianu ye la única llingua que nun se respeta n'absolutu nel Estáu español". Blanco definió al Gobiernu asturianu de Vicente Álvarez Areces (FSA-PSOE) del "mayor enemigu de la llingua asturiana".
Una proteición mínima
L'asturianu, asturlleonés o lleonés ye una llingua románica falada por ente 300.000 y 450.000, principalmente n'Asturies y Lleón, asina como en dos conceyos portugueses, Miranda do Douro y Vimioso. Esfruta de reconocencia legal tanto nel Estáu español como nel portugués, pero sólo ye oficial nesti segundu.
La Llei d'Usu y de Promoción del Asturianu, del 1998, ye la principal ferramienta llexislativa de proteición de la llingua nel Principáu, pero hai una demanda importante pa dir un pasu más allá y reconocer la oficialidá de la llingua. Ente los que lluchen con esti envís destaquen la Xunta Pola Defende de la Llingua Asturiana y el Conceyu Abiertu Pola Oficialidá, la plataforma responsable de la campaña Yo Doi la Cara pola Oficialidá.
Fonte | Nationalia
No hay comentarios:
Publicar un comentario