La Xunta Pola Defensa de la Llingua Asturiana fai un llamamientu a "tolos sectores democráticos pa que tean preparaos pa movilizase en cuantes entamen los trabayos de reforma del Estatutu d'Autonomía". La organización espresó la so intención de lluchar "democráticamente" porque'l nuevu testu que s'apruebe recueya la oficialidá de la llingua asturiana, porque "un estatutu ensin oficialidá ye un esatutu antidemocráticu y represor y eso nun ye bono p'Asturies nin pa los asturianos".
Nestos términos, espresaos al traviés d'un comunicáu, la Xunta respondió a les recientes declaraciones del conseyeru d'Educación, José Luis Riopedre, refiriéndose a les negociaciones pa la ellaboración del nuevu Estatutu, y a la posibilidá d'incluyir la oficialidá del asturianu nel mesmu, dalgo que'l responsable autonómicu refuga.
La Xunta recordó-yos al conseyeru y a la Federación Socialista Asturiana, que "tienen d'escoyer ente les llibertaes o la represión", "Riopedre tien d'escoyer ente reprimir a los que piden drechos o dar llibertaes pa qu'use l'asturianu quien quiera. Cola primer opción unos sufren discriminación; cola segunda, toos tienen derechos llegales", señaló'l comunicáu.
La Xunta refugó de la mesma manera l'argumentación del responsable autonómicu asturianu, gallegu, cuando señaló que "cuando se negocia naide tien de quedar como vencedor o vencíu". Los defensores del asturianu entrugaranse a esti respeutu: "¿Cómo quier que se sienta'l ciudadanu que quier facer usu del asturianu y l'alministración-y lu niega porque nun ye oficial?".
