Cellebráronse ente'l 14 y'l 20 xunetu nel País de Morlaix (Bretaña), los XIII Xuegos Náuticos Atlánticos que son l'heriede de los Xuegos Náuticos Intercélticos que foron criyaos en Bretaña en 1995 y tienen llugar tolos años de mediaos a finales de xunetu, tando reconocíos poles Federaciones Internaciones de los deportes náuticos (vela, surf, remu...). Dengún representante asturianu participó nesta cabera edición.
Estos Xuegos Náuticos Atlánticos organícense baxo l'autoridá d'un Comité Internacional rexíu pola Llei d'asociación francesa de 1901, y ta compuestu per cuatro representantes de ca país miembru, qu'asoleya'l pliegu de condiciones pa los países organizadores y un reglamentu xeneral, marca llugares y dates de cellebración de los xuegos y amuesa les condiciones mas afayaíces pal so desendolcu.
Asturies ye País fundaor de los Xuegos y como tal organizó les ediciones de los años 2000 y 2005 en Xixón. Tamién foron sé d'estos xuegos notres ediciones Bretaña, País de Gales, Cornual.les, Escocia, Portugal, Irlanda y Galicia. La sé pal 2008 van ser Sopelana y Gel.lo nel País Bascu español que foi almitíu comu miembru permanenti nel 2004.Sigún el presidente del Comité Internacional, “la cellebración d'estos Xuegos en Sopelana y Gel.lo nel 2008, va suponer ampliar los mesmos a otres fasteres del Arcu Atlánticu como Canaries, Andalucía y sur de Portugal, amás d'amestar delles modalidaes deportives, como'l kayak".
Sedría perimportante curiar la presencia permanenti d'Asturies n'esti y en tolos foros, alcuentros, xuegos, mercaos..., que xiren alrodiu de la cultura, del deporte, de la música, tamién de la economía (pero non solo), de los países atlánticos. Prestaríamos saber la opinión de la conseyera de Cultura, de Turismu y de Deportes del gobiernu asturianu, ¡¡si ye qu'existi!!.
