El Conceyu Escolar del Estáu, máximu muérganu consultivu del Gobiernu central en materia educativa, aprobó güei una enmienda na que se recomienda al Gobiernu d'Asturies la creyación de la especialidá de Llingua Asturiana nos planes d'ensiñanza. Con 24 votos a favor, 15 a la escontra y 6 abstenciones, esti muérganu estatal aprobó nel so conceyu la propuesta, na que también se pide la normalización de datos referentes a la escolarización en llingua asturiana y gallegu asturianu.
La enmienda foi presentada pola Confederación de Sindicatos de Trabayadores de la Ensiñanza (CSTE) na que ta integráu'l SUATEA, sindicatu que lleva plantegando esta demanda dende fai años. La vocera del mesmu, Beatriz Quirós, mostró la so satisfaición, asegurando que ye "un fechu hestóricu na reivindicación y reconocimientu del asturianu, qu'hasta agora fuera refugáu".
Creyar la especialidá de llingua asturiana diba suponer que los profesores qu'imparten esta materia diben tener el mesmu estatus de los d'otres que sí cuenten con especialidá, como l'inglés, les matemátiques, y la llingua castellana. Diben optar a places nos estitutos y diben poder solicitar trellaos a otros centros, pa siguir impartiendo l'asignatura d'asturianu. Sicasi, al tratase sólo d'una recomendación estatal, Quirós señaló la importancia de que "l'Estáu recomienda a l'Alministración autonómica que se reconoza oficialmente la ensiñanza del asturianu, materia que agora ta nun limbu".
El Conceyu Escolar aconcéyase ca añu y emite un informe xeneral sobre la situación de la ensiñanza nel Estáu. Quirós recordó qu'hasta agora "enxamás se ficiera nenguna referencia a la situación de la ensiñanza de la llingua d'Asturies".
Esti añu l'informe va incluyir esa referencia, amás de datos d'escolarización, tanto del asturianu como del gallegu asturianu.
SUATEA va pidir al Gobiernu autonómicu entrante que "considere esta recomendación del Conceyu Escolar del Estáu".
