5/8/08

Conceyu Abiertu d'Andecha Astur por un nuevu Estatutu nacional y democráticu

Énte la situación aniciada cola reforma del “Estatuto de Autonomía para el Principado de Asturias” y énte la necesidá de da-y una rempuesta dende’l nacionalismu d’izquierda, Andecha Astur camienta que ye imprescindible facer un analís lo más ampliu posible, de tala miente que puea ser compartíu pol mayor númberu de presones y muerganizaciones, y darréu d’ello avanzar nuna xunidá d’aición que permita reactivar la rempuesta popular a la situación predemocrática que carecemos n’Asturies..

Ello asina, ufiértase’l presente documentu a alderique abiertu, alvirtiendo que se trata d’un documentu voluntariamente inacabáu al oxetu de que seya más permiable a toles collaboraciones.

La dinámica de participación ye bien cenciella.

  1. Tien calter universal. Pudiendo participase a nivel presonal o colleutiu.
  2. Toles participaciones tendrán que contar con una redaición alternativa o nueva (especificando separtáu y puntu) y si se quier con una desplicación del porqué de lo propuesto.
  3. Facilitaráse nome y direición de corréu lletrónicu o de contautu si se fae per escrito, con vistes a contautar posteriormente pa la convocatoria d’un Conceyu Abiertu que se convocará públicamente y nel que –comu’l nome indica- podrá participase con voz y votu, y nel que s’aprebaría’l testu definitivu.
  • Pa participar vía internet: www.andecha.org
  • Pa participar per escrito:
    Andecha Astur
    C/ Prendes Pando 11
    33208 Xixón



Documentu d’analís de la situación política xenerada pola reforma del “Estatuto del Principado” y llínies básiques d’actuación y rempuesta.

A- ESTATUTU D’AUTONOMÍA

  1. Dende una perspeutiva nacionaliega, un estatutu autonómicu nun pue tener más sentíu que comu pasu intermediu haza la reconocencia de la soberanía nacional. Lo que requier d’un alcuerdu previu ente les dos partes en conflictu, nel nuesu casu: L’Estáu español y Asturies.
  2. Inclusu sedríe posible almitir comu válidu un procesu autonómicu qu’ensin la voluntá precisa del Estáu español, sí que permita gatuñar aspeutos concretos de soberanía que refuercie la posición asturiana nesti desigual conflictu.
  3. Ello asina, ye nidio que’l “Estatuto de Autonomía para el Principado de Asturias” ye un documentu inútil nel fondu (en tantu que nun supón más qu’una curtia descentralización alministrativa) y na forma (por imposición dende Madrid), col que l’Estáu español afita pasu ente pasu la so dominación sobro’l nuesu país.
B- ÉNTE LA REFORMA DEL ESTATUTU “DEL PRINCIPADO”
  1. Esta segunda reforma del “Estatuto de Autonomía para el Principado de Asturias”, tien de ser analizada necesariamente dende’l fechu ciertu de que’l “Principado” y l’Estatutu d’Autonomía pa elli otorgáu nun son resultáu de la voluntá soberana del Pueblu Asturianu, sinon consecuencia única de la imposición del Estáu español, qu’a diferiencia de lo qu’ocurrió n’otros pueblos, enxamás nun mos permitió pronunciamos democráticamente sobro la so aceutación o non.
  2. De magar esta rialidá, el “Principado”, el so “estatutu” y les sos posteriores “reformes” nun puen ser de recibu non solo pa dengún nacionaliegu, sinon pa denguna presona que se considere demócrata.
  3. Por embargu, la práutica política diaria impónmos acupamos d’esta reforma estatutaria en tantu que condiciona fondamente’l futuru políticu prósimu de la nuesa nación y define un marcu políticu nel que’l conxuntu de la sociedá asturiano va vese obligao a movese, ello asina Andecha Astur vese na responsabilidá de responder al mesmu.
  4. Ello asina, y considerando preciso nun entamu averase a lo que fo’l procesu estatutariu que carecimos n’Asturies, considérase prioritario la conocencia del documentu “Erbíes” en tantu lu recueye y analiza.


    C - SITUACIÓN D’ANGUAÑU

  1. Ye nidio que l’actual correllación de fuercies nun podemos cuntar colos mecanismos istitucionales afayaizos pa defender la postura asturiana (una vuelta más hai que considerar que ye primordial la rentabilización política de los nuesos avances na sociedá), y nel mesmu sen, la nuesa capacidá d’incidencia al traviés de los medios de comunicación mayoritarios ye práuticamente nula.
  2. Eso supón que tenemos qu’afayar la nuesa rempuesta táutica a les nueses posibilidaes oxetives, porque nun se trata namás de caltener una postura políticamente correcha nesti aspeutu del conflictu, sinon ser quien a que’l conxuntu de la sociedá asturiana seya quien a percibir tanto la esistencia del conflictu comu les alternatives qu’ufierta’l nacionalismu asturianu.
  3. Nesi sen, plantegámosmos dos niveles d’actuación, ún a nivel estratéxicu que ye inamovible: la única validez de la fórmula estatutaria comu pasu intermediu haza la reconocencia de la soberanía nacional asturiana y otru a nivel táuticu qu’entendemos tien d’encontiase nes grandes contradiciones nes qu’entra l’Estáu español y les sos partíos títeres nel nuesu país al defender esti estatutu impuestu, afondando nel fechu ciertu y socialmente conocíu de que non solo nun reconoz el mesmu techu competencial qu’a otres comunidaes (lo que yá ta escomenzando a presentase comu daqué “normal”) sinon y sobro too nel agraviu comparativu que supón qu’a los asturianos –a diferencia qu’a vascos, andaluces, gallegos, catalanes…- ensiquiera se mos permita votar nin la istitución –el “Principado”- nin l’Estatutu.
  4. Esti aspeutu discriminatoriu fondamente sentíu pol conxuntu de la sociedá asturiano que lo percibe comu un fechu ciertu, pero dificilmente desplicable, tien de servimos p’afondar na so espresión política, complementando esa percepción con la desplicación evidente de qu’ello obedez a unos plantegamientos colonialistes y d’asimilación nacional por parte del Estáu español, nel que la non reconocencia de la oficialidá del asturianu, la segregación llingüística social y económica del ocidente asturianu, la emigración forciada de miles de mozos tolos años, la precariedá llaboral, l’esfarrapamientu industrial, la estroza mendioambiental…. nun son ellementos independientes que puean ser analizaos individualmente, sinon consecuencia de l’aplicación del proyeutu políticu del Estáu español pa con Asturies a la gueta del so esaniciu comu pueblu.

D - ASPEUTOS TÁUTICOS

  1. Ello asina, ún de los mayores erros nos que podemos cayer ye’l considerar los aspeutos concretos del actual estatutu y de les pretendíes reformes al mesmu que previsiblemente van aprebase. Entrar nesi alderique falsu namás supón da-y validez al mencionáu estatutu y al paripé de reforma estatutaria na qu’agora s’afayen.
  2. Entrar a falar de financiación autonómica, la forma d’elleición de presidente o de convocatoria d’Elleiciones autonómiques… supón entrar nel xuegu marcáu dende Madrid y lleváu alantre polos partíos títeres n’Asturies, dando-y valir a una farsa ensin dengún sentíu nin oxetu.
  3. La custión principal, al rodiu la que tenemos qu’arreyar fuercies y sensibilidaes, y per ende, la única que tien de ser plantegada ye que se trata d’un estatutu y una istitución impuestos, y qu’eso supón una situación antidemocrática y un agraviu comparativu respeutu a otres comunidaes del Estáu español a les que sí se-yos permitió exercer tal drechu.
  4. Comu mensaxe secundariu, y complementariu al principal, hai que desplicar que les causes de que nun permiten opinar al Pueblu Asturianu son cenciellamente por que son coscientes dafechu de qu’ésti enxamás nun almitiría un Estatutu autonómicu que polo menos nun supunxera un tratu discriminatoriu pa col restu de “comunidaes” del Estáu, y poque permitir al Pueblu Asturianu opinar respeutu al marcu políticu nel que quier desendolcase supondríe sacar a la lluz el braeru alderique de fondu: la soberanía nacional asturiana.

E - LLINGUA ASTURIANA

  1. La Oficialidá de la llingua asturiana, foi presentada y ye sentía polos más de la sociedá asturiana comu aspeutu fundamental a algamar nesta nuea reforma estatutaria, por embargu, lo cierto ye qu’esta custión ta siendo emplegada comu un mecanismu pa solapar el problema de fondu –l’ausencia de llibertaes y drechos democráticos n’Asturies y la imposición del Estatutu y del “Principado”- propiciándose un alderique y unes movilizaciones ermos, a sabiendes de qu’esta vía ye cenciellamente inútil.
  2. Ello asina ye imprescindible dexar perafitao:

    1. Que ye imposible algamar la oficialidá na actual reforma estatutaria, darréu que tantu’l PSOE comu’l PP ñéguense a almitir principios democráticos pa la sociedá asturiana.
    2. Que nun se trata d’un conflictu puramente llingüísticu, sinon inegablemente políticu, qu’hai qu’analizar nel contestu enantes desplicáu y que toles iniciatives de despolitizalu beneficien dafechu la posición españolista.
    3. Que nun ye ético l’embayar a la xente plantegándose la oficialidá comu oxetivu prósimu y qu’ello nun acarreta más que la desmovilización a mediu plazu.
    4. Qu’agora mesmo los únicos movimientos válidos son aquellos que:

    i. Pongan n’evidencia la situación predemocrática na que mos afayamos.

    ii. Tean un costu socio-políticu pa les presones y formaciones sociales, polítiques y económiques qu’afiten esta situación.

    iii. Abran víes nueves d’actuación pa que se reconozan los drechos llingüísticos del Pueblu Asturianu.



  3. Per otru llau, y de forma absoluta consideramos d’una falta dafechu d’ética que se remane la demanda de la oficialidá de la llingua asturiana pa sofitar la oficialidá de lo que’l PSOE inventó hai 15 años -el “gallego-asturiano”- afirmando qu’esti despropósitu namás beneficia a los intereses desintegraores de la nación asturiana y considerando a cualaquier presona y/o muerganización qu’a ello collabore comu contraria a los llexítimos drechos ya intereses del Pueblu Asturianu y collaboracionista colos más baxos comportamientos españolistes.
  4. Nesi sen, la redaición agora propuesta pal artículu 4º “..:”
  5. Supón un trunfu dafechu del españolismu, en tantu qu’afita n’igualdá de rangu y condiciones a la llingua asturiana y l’inventu del PSOE del “gallego-asturiano”, abriendo les puertes a un nuea academia gallego-asturiana y afitando secundariamente qu’hai asturianos que son medio gallegos ya inventando un territoriu tamién medio gallegu, nun pasu prósimu a la segregación política d’esa fastera pa la que’l PSOE yá pidió un estatutu propiu.
  6. En cualuquier casu, y denunciando’l papel que xueguen plataformes pretendidamente xunitaries nesti conflictu –qu’apaecen y esapaecen con ca reforma estatutaria-, Andecha Astur ye cosciente de que munches presones y muerganizaciones que nelles conflúin, nun son coscientes del remanamientu del que son oxetu, nin de la gravedá de la so política, o inclusu siéndolo prefieren sacrificar aspeutos cuya importancia nun perciben (el francimientu de la xunidá llingüística, o la hipocresía de pretender defender la oficialidá y reprimila na so práutica diaria…) o en tou casu camienten que ye secundario y “sacrifíquenlo” a la gueta d’una mayor xunidá d’aición.
  7. Pesia ello, Andecha Astur nun entrará nuna política d’enfrentamientu con denguna presona nin mueganización, nin dexará de participar en movilizaciones llingüístiques nes que podamos coincidir, anque seya parcialmente.
  8. La llucha idiolóxica y la negativa dafechu a la collaboración col españolismu en cualaquier de les sos espresiones son les ferramientes de les que tenemos que char mano pa torgar el remanamientu –y postrer fundimientu- del movimientu llingüísticu asturianu pol PSOE-IU.

F - PROPUESTES CONCRETES

  1. Afitar comu criterios de la campaña la denuncia de la imposición de la Istitución del “Principado” y del “Estatuto de Autonomía”, asina comu les reformes feches al mesmu, cientrándomos nel agraviu comparativu que supón qu’a los asturianos a diferiencia d’otros pueblos nun se mos tea permitío votalu, cola referencia de la falta de democracia que se vive n’Asturies.
  2. Complementar esi discursu primariu col discursu estratéxicu principal: La falta de Democracia n’Asturies.
  3. Considerar que l’anterior analís y posible campaña nun tien de ser padrimonial d’Andecha Astur, sinon que ye mui asumible socialmente, inclusu por presones y/o mueganizaciones que nun ten necesariamente nidia la custión nacional. Ello asina:

    i. Contautaráse con otres formaciones socio-polítiques al oxetu de da-yos a conocer la nuesa postura y campaña

    ii. Facilitaráse l’alderique en Conceyu Abiertu del presente analís y propuestes, nun entamu al traviés d’internet, y llueu de forma presencial.

    iii. Collaboraráse en toa iniciativa que coincida colos oxetivos equí espuestos independientemente de los convocantes.

    iv. Abriránse víes de collaboración p’aquelles presones y formaciones que compartan l’analís equí desendolcáu y quieran participar na necesaria rempuesta a la situación esistente.

    v. Intentaráse nun patrimoninalizar comu Andecha les iniciatives y movilizaciones, de tala miente que’l restu les formaciones perciban que lo qu’importa son los conteníos y non la rentabilización socio-política de la campaña-

  4. Centrar la nuesa actuación a nivel de cai, y de conceyu, considerando les Cases-Conceyu comu la Istitución más prósima a les nueses posibilidaes d’actuación político.
  5. Ensin perxuiciu de lo enantes reseñao, Andecha Astur dirá entamando les actuaciones sociales que camiente afayaices siempre na llinia de la collaboración y converxencia con otres formaciones, a la gueta d’ameyorar la capacidá d’incidencia social nel necesariu avance haza la normalización democrática n’Asturies.