Aréstegui diz qu'el PP ye "claru" col asturianu y apoya l'ampliación de derechos ensin obligatoriedá.
Critica la postura "zarrada" del PSOE y apuesta pola "flexibilidá" ante un derechu ciudadanu, anque nun apoya una "realidá artificial"Señala la bona relación del PP cola Academia de la Llingua, a la que pidió que busque una "fórmula llegal" qu'evite la obligación
UVIÉU, 28 de Payares (EUROPA PRESS)
El diputáu del Partíu Popular na Xunta Xeneral del Principáu, Joaquín Aréstegui, apuntó güei que la postura del so grupu en relación cola llingua asturiana ye "clara": apoyar la "ampliación de derechos" pa los ciudadanos que quieran utilizala pero ensin qu'eso suponga la "obligación" de conocela y usala pa tolos asturianos.
Aréstegui consideró, en declaraciones a Europa Press, que la Llei d'Usu y Promoción del Asturianu ye "lo suficientemente amplia" como pa que puedan ampliase los derechos ciudadanos, anto a cursar escritos n'asturianu, como a promover la conocencia de la llingua y la cultura asturianes. El diputáu popular recordó que la Llei foi aprobada demientres el Gobiernu del PP en 1998, y considera que "bien aplicada" pue ser una norma amplia.
Nesi sen, criticó la posición de la FSA-PSOE que ta tomando una actitú "mui zarrada" a la escontra a la oficialidá del asturianu. Según Aréstegui, el PP ye "más flexible" porque apoya l'ampliación de derechos ciudadanos siempre que nun lleven implícitos la obligatoriedá pa otros ya qu'esto pue xenerar una "realidá artifical" de la sociedá asturiana.
"Nun quisiera qu'Asturies perdiera la oportunidá de contar con profesionales cualificaos d'otres comunidaes por poner l'asturianu como barrera llingüística", dixo'l diputáu. Al respecto, criticó los modelos d'oficialidá de comunidaes como Cataluña y Galicia que lleven implícitu, según él, una "marcada obligatoriedá".
ÓRGANU CONSULTIVU.
Joaquín Aréstegui destacó'l llabor de l'Academia de la LLingua como órganu consultivu p'abordar la situación del asturianu. Dixo qu'existe una bona relación ente'l PP y l'academia y que de fechu, se-y solicitó que busque una "fórmula llegal" qu'evite la obligación. "Vamos apoyar les propuestes que se faigan pa meyorar la situación del asturianu siempre que nun implique la obligatoriedá", aseveró'l diputáu.
L'Academia de la Llingua Asturiana señaló siempre la declaración espresa d'oficialidá nel Estatutu d'Autonomía del Principáu como "la única" solución xurídica pal asturianu. De la mesma manera, sostién qu'hai munches maneres de desarrollala de manera progresiva una vez que tea reconocida y de manera que nun plantegue nengún problema.
Pa l'Academia, una cosa ye la reconocencia y otra la implantación de la oficialidá, ya que la Xunta Xenral va ser la encargada dempués, d'aprobar una llei que desarrolle la oficialidá na que se van poder establecer plazos, modelos, fases y presupuestos.
