El CAO presenta les 7.000 semeyes pola oficialidá del asturianu.
Mientres los asturianos dan la cara en llibertá, a los partíos mayoritarios cayó-yos la careta.
Fernando Ornosa denuncia les mentires del PP - PSOE:
- El PSOE refugó nel so congresu asturianu siete enmiendes a favor de la oficialidá, nin siquier se recoyó la declaración del asturianu como llingua.
- El PP xugó colos ciudadanos, porque nel so día faló de favorecer un marcu llegal que garantice la sobrevivencia de la llingua.
- El Estatutu pautáu pol PP - PSOE nun garantiza a los asturianos los mesmos derechos que al restu de los ciudadanos del Estáu.
UVIÉU, 10 de Setiembre (EUROPA PRESS)
La campaña 'Doi la cara pola oficialidá', que recueye semeyes de persones que posen con carteles que reivindiquen la oficialidá de la llingua asturiana na reforma del Estatutu d'Autonomía d'Asturies, lleva yá recoyíes más de 7.000 fotos.
Asina lo informó'l coordinador y diseñador de la mesma, Poli Mencía, en rueda prensa na que compareció con Fernando Ornosa, voceru del Conceyu Abiertu pola Oficialidá, que punxo en marcha la iniciativa.
Nesti momentu, según Mencía, hai xubíes na páxina 'web' doilacara.net 6.297 semeyes, a les que Mencía sumó otres "más de 600" que se realizaron demientres esti fin de selmana y tovía nun fueron colgaes.
Ente'l total de semeyes subíes, destaca, penriba del restu, la del futbolista David Villa, fecha a la so llegada a Asturies dempués de la so participación na Eurocopa 2008. Otres persones conocíes que tamién salen retrataes son el ciclista Chechu Rubiera, la escritora Corín Tellado o los componentes del grupu Nuberu, Chus Pedro y Manolo Peñayos.
Doilacara.net ofrez la posibilidá de descargar el cartel col que se ha facer la semeya. Según el coordinador de la campaña, munches persones ficieronlo aprovechando los sos viaxes de vacaciones nesti branu. Asina, recibieronse semeyes de xente que posa na Plaza Roxa de Moscú, na Muralla China o nel centru Lisboa.
Mencía destacó tamién que la páxina recibió cerca de mediu millón de visites y que'l corréu de la mesma acumuló un total de 3.451 megues d'información de datos recibíos d'internautes qu'apoyen la campaña.
Amás, de les semeyes, los organizadores tamién tán colgando vídios na páxina youtube.com de persones "de reconocíu prestixu social" qu'apoyen la oficialidá. Nesti momentu hai tres xubíos: ún de José Ángel Hevia, otru de Corín Tellado y otru de Carmen Ojeda.
La campaña tamién va visualizase na cai de magar esta selmana, mediante l'espardimientu de folletos esplicativos, pegatines y la venta de camisetes cola títulu.
MANIFESTACIÓN.
Ornosa aprovechó la ocasión pa dexar claro que la campaña va caltenese a lo llargo del procesu d'ellaboración del nuevu Estatutu, y nesti contestu anunció la convocatoria d'una nueva manifestación per parte del CAO. Va tener llugar el prósimu día 4 d'ochobre, de magar les 18.00 hores, y va salir dende la Estación de Renfe d'Uviéu.
El próximu llunes, a les 10.30 hores, tamién va tener llugar una concentración ante la Xunta'l Principáu, coincidiendo col conceyu de la ponencia estatutaria.
Ornosa refirióse tamién na rueda prensa a les últimes declaraciones del voceru del Grupu Socialista nel parlamentu autonómicu, Fernando Lastra, sobre'l nuevu Estatutu d'Autonomía. Según el diputáu, los asturianos van tener los mesmos derechos y obligaciones que'l restu de los ciudadanos del Estáu.
"Eso ye mentira", afirmó Ornosa. "Tenemos negaos derechos y esti estatutu que s'aprueba nun ye nin garantía nin fonte d'ellos", afirmó. Criticó duramente a los dos principales partíos. Del PP, dixo que "xugó colos ciudadanos", porque "nel so día faló de favorecer un marcu llegal que garantice la sobrevivencia de la llingua". Del PSOE, afirmó que, amás de "refugar nel so congresu asturianu siete enmiendes a favor de la oficialidá, nin siquier se recoyó la declaración del asturianu como llingua".
