A la gueta de la vía llegal: 2u. llamáu a Conceyu de Xuristes pol Asturianu

Hai un mes, dende l’Aconceyamientu de Xuristes pol Asturianu proponíemos entamar la igua d’una asociación hermana na que pudieren organizase tolos ciudadanos que, nun teniendo la condición de xuristes, quixeren sofitar el frente llegal del conflictu llingüísticu.

La rempuesta de persones y asociaciones foi, arriendes de granible, de más ambiciu que’l proyeutu porque, en bien de casos, propúnxose dar un pasín más p’aportar cola infraestructura xurídica non sólo a les manifestaciones del conflictu llingüísticu sinón a tolos conflictos -de la mesma triba, al cabu- que vien xenerando l’intentu de “camudar al país asturianu na décima provincia castellano-lleonesa” (afirmación mui descriptiva del procesu de desaniciu que carez Asturies).

De la parte de nueso nun va quedar el llegar a onde se pueda y el pasu darréu sedrá ponderar la fuercia atropada y ufierta-y una organización afayadiza. Pa ello,

• FACEMOS UN SEGUNDU LLAMÁU A LA CIUDADANÍA QUE TEA POL LLABOR, PA QUE CONTAUTEN CON NÓS AL TRAVIÉS D’UN CORRÉU LLETRÓNICU UNVIÁU A LA DIREICIÓN axuristesa@hotmail.es, SO LA TEMA “ASTURIES YE POSIBLE”.

N’Uviéu, nel entamu d’un Día d’Asturies que protagonizarán, otra vuelta más, les fuercies polítiques antiasturianistes.

Xurde Blanco.

Xuristes pol Asturianu califica la Ordenanza d'Usu del Asturianu en Conceyu Xixón d'escosa y preconstitucional.

• Axa tamién denuncia la falta de procuru del testu "que carez d'una redaición illetrada, probetaya y desdexada".
  

Nel BOPA de 28 d’agostu del añu qu’andamos, l’Ayuntamientu de Xixón anunciaba l’aprobación del aniciu del proyeutu de la Ordenanza Municipal d’Usu del Asturianu nel Conceyu, abriendo’l preceutivu periodu d’información pública per 30 díes.
Tres esaminalu con tol procuru, la Xunta Direutiva del Aconceyamientu de Xuristes pol Asturianu apautó nun perder el tiempu apurriendo suxerencies pa un testu que nun tien igua dala porque:
1. De les nueve aiciones municipales mínimes que rellaciona l’artículu 10 de la Carta Europea de les Llingües Rexonales o Minoritaries, nos términos de la so ratificación por España, la ordenanza de Xixón namás reconoz dos y parte d’una tercera, too ello yá previsto na Llei 1/1998, d’Usu y Promoción del Asturianu (artículu 8) y que por ello practíquense davezu en bien de conceyos d’Asturies ensin falta d’ordenances nin cacarexos: l’emplegu de la llingua pola ciudadanía y los sos representantes municipales, si-yos peta, y l’asoleyamientu de dalgunos testos municipales n’asturianu.
2. Por embargu, dexa ensin reconocencia tolo que cinca al emplegu de la llingua nel marcu de l’alministración y servicios municipales y nun fai res por encadarmar los preseos afayadizos pa que les declaraciones d’intenciones puedan camudase en realidaes, xustamente lo que manden la Carta Europea, nos seyes y mediu parágrafos escaecíos y la Llei 1/1998, nel so mentáu artículu 8.
3. L’Ayuntamientu, por nun llegar nin llega a escosar les posibilidaes qu’ufre’l Real Decretu 1111/1979, pel que se regula l’emplegu de les estremaes llingües españoles nes actuaciones de les corporaciones llocales, mentantu nun se formalice la previsión d’oficialidá contenía nel artículu 3.2 de la Constitución. Con ello, una vuelta más, asítiase a Asturies, nesta materia, na dómina preconstitucional.
4. Arriendes de la vieya pexiguera (artículu 12) de “se desarrollará un Plan de Normalización Social del Asturiano” –lo que ye siguir dando tiempu a que la cosa pudra- y el recursu a les grandones declaraciones programátiques -que nuna norma de tan baxu rangu fieden a repla demagóxica (la mesma qu’empobinó a ún de los pas del albuertu a calificalu de “hito histórico”)- ye al cabu una fras, recoyida nel so artículu 5, la que meyor resume y define l’algame de la ordenanza: “se utilizará el castellano y el asturiano de forma adecuada”.
5. Como dios cuando da ciega, nesti casu l’enxendru carez tamién d’una redaición illetrada, probetaya y desdexada.
Pola Xunta Direutiva del Aconceyamientu de Xuristes pol Asturianu, robla’l so secretariu, en Xixón a tres de setiembre de dos mil ocho.
Xurde Blanco Puente.

Xuristes pol Asturianu pidi'l sofitu ciudadanu pa enanchar el conflictu llingüísticu y facer cumplir los derechos de los falantes d'asturianu.

La Xunta Direutiva d'Aconceyamientu de Xuristes pol Asturianu afala a iguar un conceyu hermanu nel que puedan organizase los non profesionales del drechu que compartan los sos principios y estratexes.

El determín de “desprovincializar” la xusticia y aportar col conflictu llingüísticu del país al Tribunal Constitucional y, llegáu’l casu, al Européu de los Drechos Humanos, tien un trabe económicu impuestu pel pesu de la carga a repartir ente’l mediu centenar d’asociaos al Aconceyamientu de Xuristes pol Asturianu, llende que torga más d’una iniciativa amañosa.

D’otra miente, dementres l’impedimentu al emplegu de la nuesa llingua guaña en toles actividaes profesionales y perdayuri, el conflictu social que xenera nun se materializa n’actuaciones aposentaes y bien empobinaes al oxetivu, por toos perseguíu, de respetu social a los drechos de los falantes d’asturianu, quiciás pola rocea que’l común de la ciudadanía amuesa nel intre de vese abocada a entamar una reclamación alministrativa y, entá más, xudicial. Rocea vieya y xustificada porque los poderes públicos n’España diséñense d’abenayá más pa servir al estáu qu’al ciudadán, pero que nun tien porque alloñamos tanto del poder como pa nun aprovechar les resquiebres y contradicciones que xenera y más cuando’l camín tien l’acabu en tribunales internacionales, de xuru ensin tantos posos imperiales y centralistes y dengún franquista.

Poro, pa entrambes les dos coses –sofitar económicamente’l frente llegal del conflictu llingüísticu y enanchalu a toles sos manifestaciones, encadarmando les aiciones sociales y llegales oportunes y a suxerencia de delles persones que vienen alendando a l’asociación ensin poder ser parte d’ella, la Xunta Direutiva del Aconceyamientu de Xuristes pol Asturianu afala a iguar un conceyu hermanu nel que puedan organizase los non profesionales del drechu que compartan los nuesos principios y estratexa y a talu efeutu,

• FAI UN PRIMER LLAMÁU A CIUDADANOS QUE TEAN PEL LLABOR D’ALENDAR UNA ASOCIACIÓN DE SOFITU AL ACONCEYAMIENTU DE XURISTES POL ASTURIANU Y ENANCHAMIENTU DE LOS SOS OXETIVOS, PA QUE MANIFIESTEN ESI COMPROMISU AL TRAVIÉS D’UN CORRÉU LLETRÓNICU UNVIÁU A LA DIREICIÓN xuristespolasturianu@hotmail.com SO LA TEMA “ASTURIES YE POSIBLE”.