L'asturfobia de l'alministración autonómica pon en riesgu tol patrimoniu d'Asturies.

Esto ye Craggaunowen, Irlanda.






Y esto ye Asturies: Braña La Pornacal, Vil.lar de Vildas, Somiedu.


y les cabanes de teitu nun son una esceición, tamién los horros sufren un de los peores réximes de la historia d'Asturies




Esto ye lo que queda d'una panera del sieglu XVIII nel pueblu de Sietes, Villaviciosa.

Renfe adelántase a lo que va ser el "nuevu Estáu Federal"

Semeya: PP-PSOE van convertimos en castellanos al traviés de la reforma l'Estatutu.


La llínia ente Barcelona-Asturies-Barcelona va quedar suprimida dende'l 15 de setiembre sigún una nota de la empresa de fierrucarriles Renfe dada a conocer güei. Los pasaxeros d'estos trenes van tener que facer tresbordu en Lleón tanto nos sos destinos Asturies, como Barcelona dende Asturies, al tener que facer el viax na llínia Barcelona-Galicia-Barcelona.

Asturies desapaez del mapa de les comunicaciones nel norte peninsular y del exe Cantábricu-Mediterrániu pa convertise nuna "entidá menor" con apeaderu en Lleón. Esta, como otros munchos cambéos que diremos viendo col tiempu, ye un adelantu de lo que será el nuevu Estáu Federal o Confederal, ya veremos, nel que'l poder va tar nes manes de les nacionalidaes que lu formen.

D'aprobase la reforma l'Estatutu que ta agora na Xunta Xeneral, Asturies, per voluntá de la so clas política, que trabaya en tolos órdenes pa facenos desapaecer, nun tará na configuración d'esti Estáu como nación, tarálo como provincia castellana y per tanto correspuende-y un apeaderu... en Lleón.

Alvaro Cuervo empapíza-yos "la gran espicha".

Les declaraciones d'Alvaro Cuervo dexaron en pelota a les "fuercies vives d'Asturies" que se revuelven escaldaos dempués del bañu de rialidá que-yos asestó el economista. Avezaos a que-yos afalaguen y-yos combayen l'estropiciu económicu, social, cultural y llingüísticu que dende décades practiquen n'Asturies, políticos, empresarios y sindicalistes esconsonen del suañu d'años y nun son a creyer que se-yos haiga escapao un elementu de la so orxástica espicha.

Colo a gusto que taben colos Premios Príncipe, colos Cursos de La Granda, colos inteleutuales de caleya, colos espertos de pisebre... y en eso llegó Fidel,

Sergio González, xugador del Depor, compite con Lastra y Aréstegui... pero una vez dio-y por lleer un llibru.

Xuristes pol Asturianu pidi'l sofitu ciudadanu pa enanchar el conflictu llingüísticu y facer cumplir los derechos de los falantes d'asturianu.

La Xunta Direutiva d'Aconceyamientu de Xuristes pol Asturianu afala a iguar un conceyu hermanu nel que puedan organizase los non profesionales del drechu que compartan los sos principios y estratexes.

El determín de “desprovincializar” la xusticia y aportar col conflictu llingüísticu del país al Tribunal Constitucional y, llegáu’l casu, al Européu de los Drechos Humanos, tien un trabe económicu impuestu pel pesu de la carga a repartir ente’l mediu centenar d’asociaos al Aconceyamientu de Xuristes pol Asturianu, llende que torga más d’una iniciativa amañosa.

D’otra miente, dementres l’impedimentu al emplegu de la nuesa llingua guaña en toles actividaes profesionales y perdayuri, el conflictu social que xenera nun se materializa n’actuaciones aposentaes y bien empobinaes al oxetivu, por toos perseguíu, de respetu social a los drechos de los falantes d’asturianu, quiciás pola rocea que’l común de la ciudadanía amuesa nel intre de vese abocada a entamar una reclamación alministrativa y, entá más, xudicial. Rocea vieya y xustificada porque los poderes públicos n’España diséñense d’abenayá más pa servir al estáu qu’al ciudadán, pero que nun tien porque alloñamos tanto del poder como pa nun aprovechar les resquiebres y contradicciones que xenera y más cuando’l camín tien l’acabu en tribunales internacionales, de xuru ensin tantos posos imperiales y centralistes y dengún franquista.

Poro, pa entrambes les dos coses –sofitar económicamente’l frente llegal del conflictu llingüísticu y enanchalu a toles sos manifestaciones, encadarmando les aiciones sociales y llegales oportunes y a suxerencia de delles persones que vienen alendando a l’asociación ensin poder ser parte d’ella, la Xunta Direutiva del Aconceyamientu de Xuristes pol Asturianu afala a iguar un conceyu hermanu nel que puedan organizase los non profesionales del drechu que compartan los nuesos principios y estratexa y a talu efeutu,

• FAI UN PRIMER LLAMÁU A CIUDADANOS QUE TEAN PEL LLABOR D’ALENDAR UNA ASOCIACIÓN DE SOFITU AL ACONCEYAMIENTU DE XURISTES POL ASTURIANU Y ENANCHAMIENTU DE LOS SOS OXETIVOS, PA QUE MANIFIESTEN ESI COMPROMISU AL TRAVIÉS D’UN CORRÉU LLETRÓNICU UNVIÁU A LA DIREICIÓN xuristespolasturianu@hotmail.com SO LA TEMA “ASTURIES YE POSIBLE”.

Conceyu Abiertu d'Andecha Astur por un nuevu Estatutu nacional y democráticu

Énte la situación aniciada cola reforma del “Estatuto de Autonomía para el Principado de Asturias” y énte la necesidá de da-y una rempuesta dende’l nacionalismu d’izquierda, Andecha Astur camienta que ye imprescindible facer un analís lo más ampliu posible, de tala miente que puea ser compartíu pol mayor númberu de presones y muerganizaciones, y darréu d’ello avanzar nuna xunidá d’aición que permita reactivar la rempuesta popular a la situación predemocrática que carecemos n’Asturies..

Ello asina, ufiértase’l presente documentu a alderique abiertu, alvirtiendo que se trata d’un documentu voluntariamente inacabáu al oxetu de que seya más permiable a toles collaboraciones.

La dinámica de participación ye bien cenciella.

1. Tien calter universal. Pudiendo participase a nivel presonal o colleutiu.
2. Toles participaciones tendrán que contar con una redaición alternativa o nueva (especificando separtáu y puntu) y si se quier con una desplicación del porqué de lo propuesto.
3. Facilitaráse nome y direición de corréu lletrónicu o de contautu si se fae per escrito, con vistes a contautar posteriormente pa la convocatoria d’un Conceyu Abiertu que se convocará públicamente y nel que –comu’l nome indica- podrá participase con voz y votu, y nel que s’aprebaría’l testu definitivu.

• Pa participar vía internet: www.andecha.org
• Pa participar per escrito:
  Andecha Astur
  C/ Prendes Pando 11
  33208 Xixón

Documentu d’analís de la situación política xenerada pola reforma del “Estatuto del Principado” y llínies básiques d’actuación y rempuesta.

A- ESTATUTU D’AUTONOMÍA

1. Dende una perspeutiva nacionaliega, un estatutu autonómicu nun pue tener más sentíu que comu pasu intermediu haza la reconocencia de la soberanía nacional. Lo que requier d’un alcuerdu previu ente les dos partes en conflictu, nel nuesu casu: L’Estáu español y Asturies.
   
2. Inclusu sedríe posible almitir comu válidu un procesu autonómicu qu’ensin la voluntá precisa del Estáu español, sí que permita gatuñar aspeutos concretos de soberanía que refuercie la posición asturiana nesti desigual conflictu.
   
3. Ello asina, ye nidio que’l “Estatuto de Autonomía para el Principado de Asturias” ye un documentu inútil nel fondu (en tantu que nun supón más qu’una curtia descentralización alministrativa) y na forma (por imposición dende Madrid), col que l’Estáu español afita pasu ente pasu la so dominación sobro’l nuesu país.

B- ÉNTE LA REFORMA DEL ESTATUTU “DEL PRINCIPADO”

1. Esta segunda reforma del “Estatuto de Autonomía para el Principado de Asturias”, tien de ser analizada necesariamente dende’l fechu ciertu de que’l “Principado” y l’Estatutu d’Autonomía pa elli otorgáu nun son resultáu de la voluntá soberana del Pueblu Asturianu, sinon consecuencia única de la imposición del Estáu español, qu’a diferiencia de lo qu’ocurrió n’otros pueblos, enxamás nun mos permitió pronunciamos democráticamente sobro la so aceutación o non.
   
2. De magar esta rialidá, el “Principado”, el so “estatutu” y les sos posteriores “reformes” nun puen ser de recibu non solo pa dengún nacionaliegu, sinon pa denguna presona que se considere demócrata.
   
3. Por embargu, la práutica política diaria impónmos acupamos d’esta reforma estatutaria en tantu que condiciona fondamente’l futuru políticu prósimu de la nuesa nación y define un marcu políticu nel que’l conxuntu de la sociedá asturiano va vese obligao a movese, ello asina Andecha Astur vese na responsabilidá de responder al mesmu.
4. Ello asina, y considerando preciso nun entamu averase a lo que fo’l procesu estatutariu que carecimos n’Asturies, considérase prioritario la conocencia del documentu “Erbíes” en tantu lu recueye y analiza.
   
   
   C - SITUACIÓN D’ANGUAÑU

1. Ye nidio que l’actual correllación de fuercies nun podemos cuntar colos mecanismos istitucionales afayaizos pa defender la postura asturiana (una vuelta más hai que considerar que ye primordial la rentabilización política de los nuesos avances na sociedá), y nel mesmu sen, la nuesa capacidá d’incidencia al traviés de los medios de comunicación mayoritarios ye práuticamente nula.
   
2. Eso supón que tenemos qu’afayar la nuesa rempuesta táutica a les nueses posibilidaes oxetives, porque nun se trata namás de caltener una postura políticamente correcha nesti aspeutu del conflictu, sinon ser quien a que’l conxuntu de la sociedá asturiana seya quien a percibir tanto la esistencia del conflictu comu les alternatives qu’ufierta’l nacionalismu asturianu.
   
3. Nesi sen, plantegámosmos dos niveles d’actuación, ún a nivel estratéxicu que ye inamovible: la única validez de la fórmula estatutaria comu pasu intermediu haza la reconocencia de la soberanía nacional asturiana y otru a nivel táuticu qu’entendemos tien d’encontiase nes grandes contradiciones nes qu’entra l’Estáu español y les sos partíos títeres nel nuesu país al defender esti estatutu impuestu, afondando nel fechu ciertu y socialmente conocíu de que non solo nun reconoz el mesmu techu competencial qu’a otres comunidaes (lo que yá ta escomenzando a presentase comu daqué “normal”) sinon y sobro too nel agraviu comparativu que supón qu’a los asturianos –a diferencia qu’a vascos, andaluces, gallegos, catalanes…- ensiquiera se mos permita votar nin la istitución –el “Principado”- nin l’Estatutu.
4. Esti aspeutu discriminatoriu fondamente sentíu pol conxuntu de la sociedá asturiano que lo percibe comu un fechu ciertu, pero dificilmente desplicable, tien de servimos p’afondar na so espresión política, complementando esa percepción con la desplicación evidente de qu’ello obedez a unos plantegamientos colonialistes y d’asimilación nacional por parte del Estáu español, nel que la non reconocencia de la oficialidá del asturianu, la segregación llingüística social y económica del ocidente asturianu, la emigración forciada de miles de mozos tolos años, la precariedá llaboral, l’esfarrapamientu industrial, la estroza mendioambiental…. nun son ellementos independientes que puean ser analizaos individualmente, sinon consecuencia de l’aplicación del proyeutu políticu del Estáu español pa con Asturies a la gueta del so esaniciu comu pueblu.

D - ASPEUTOS TÁUTICOS

1. Ello asina, ún de los mayores erros nos que podemos cayer ye’l considerar los aspeutos concretos del actual estatutu y de les pretendíes reformes al mesmu que previsiblemente van aprebase. Entrar nesi alderique falsu namás supón da-y validez al mencionáu estatutu y al paripé de reforma estatutaria na qu’agora s’afayen.
   
2. Entrar a falar de financiación autonómica, la forma d’elleición de presidente o de convocatoria d’Elleiciones autonómiques… supón entrar nel xuegu marcáu dende Madrid y lleváu alantre polos partíos títeres n’Asturies, dando-y valir a una farsa ensin dengún sentíu nin oxetu.
   
3. La custión principal, al rodiu la que tenemos qu’arreyar fuercies y sensibilidaes, y per ende, la única que tien de ser plantegada ye que se trata d’un estatutu y una istitución impuestos, y qu’eso supón una situación antidemocrática y un agraviu comparativu respeutu a otres comunidaes del Estáu español a les que sí se-yos permitió exercer tal drechu.
   
4. Comu mensaxe secundariu, y complementariu al principal, hai que desplicar que les causes de que nun permiten opinar al Pueblu Asturianu son cenciellamente por que son coscientes dafechu de qu’ésti enxamás nun almitiría un Estatutu autonómicu que polo menos nun supunxera un tratu discriminatoriu pa col restu de “comunidaes” del Estáu, y poque permitir al Pueblu Asturianu opinar respeutu al marcu políticu nel que quier desendolcase supondríe sacar a la lluz el braeru alderique de fondu: la soberanía nacional asturiana.

E - LLINGUA ASTURIANA

1. La Oficialidá de la llingua asturiana, foi presentada y ye sentía polos más de la sociedá asturiana comu aspeutu fundamental a algamar nesta nuea reforma estatutaria, por embargu, lo cierto ye qu’esta custión ta siendo emplegada comu un mecanismu pa solapar el problema de fondu –l’ausencia de llibertaes y drechos democráticos n’Asturies y la imposición del Estatutu y del “Principado”- propiciándose un alderique y unes movilizaciones ermos, a sabiendes de qu’esta vía ye cenciellamente inútil.
   
2. Ello asina ye imprescindible dexar perafitao:
   
   
   1. Que ye imposible algamar la oficialidá na actual reforma estatutaria, darréu que tantu’l PSOE comu’l PP ñéguense a almitir principios democráticos pa la sociedá asturiana.
      
   2. Que nun se trata d’un conflictu puramente llingüísticu, sinon inegablemente políticu, qu’hai qu’analizar nel contestu enantes desplicáu y que toles iniciatives de despolitizalu beneficien dafechu la posición españolista.
      
   3. Que nun ye ético l’embayar a la xente plantegándose la oficialidá comu oxetivu prósimu y qu’ello nun acarreta más que la desmovilización a mediu plazu.
      
   4. Qu’agora mesmo los únicos movimientos válidos son aquellos que:

   i. Pongan n’evidencia la situación predemocrática na que mos afayamos.

   ii. Tean un costu socio-políticu pa les presones y formaciones sociales, polítiques y económiques qu’afiten esta situación.

   iii. Abran víes nueves d’actuación pa que se reconozan los drechos llingüísticos del Pueblu Asturianu.

   
   
   
3. Per otru llau, y de forma absoluta consideramos d’una falta dafechu d’ética que se remane la demanda de la oficialidá de la llingua asturiana pa sofitar la oficialidá de lo que’l PSOE inventó hai 15 años -el “gallego-asturiano”- afirmando qu’esti despropósitu namás beneficia a los intereses desintegraores de la nación asturiana y considerando a cualaquier presona y/o muerganización qu’a ello collabore comu contraria a los llexítimos drechos ya intereses del Pueblu Asturianu y collaboracionista colos más baxos comportamientos españolistes.
   
4. Nesi sen, la redaición agora propuesta pal artículu 4º “..:”
   
5. Supón un trunfu dafechu del españolismu, en tantu qu’afita n’igualdá de rangu y condiciones a la llingua asturiana y l’inventu del PSOE del “gallego-asturiano”, abriendo les puertes a un nuea academia gallego-asturiana y afitando secundariamente qu’hai asturianos que son medio gallegos ya inventando un territoriu tamién medio gallegu, nun pasu prósimu a la segregación política d’esa fastera pa la que’l PSOE yá pidió un estatutu propiu.
   
6. En cualuquier casu, y denunciando’l papel que xueguen plataformes pretendidamente xunitaries nesti conflictu –qu’apaecen y esapaecen con ca reforma estatutaria-, Andecha Astur ye cosciente de que munches presones y muerganizaciones que nelles conflúin, nun son coscientes del remanamientu del que son oxetu, nin de la gravedá de la so política, o inclusu siéndolo prefieren sacrificar aspeutos cuya importancia nun perciben (el francimientu de la xunidá llingüística, o la hipocresía de pretender defender la oficialidá y reprimila na so práutica diaria…) o en tou casu camienten que ye secundario y “sacrifíquenlo” a la gueta d’una mayor xunidá d’aición.
   
7. Pesia ello, Andecha Astur nun entrará nuna política d’enfrentamientu con denguna presona nin mueganización, nin dexará de participar en movilizaciones llingüístiques nes que podamos coincidir, anque seya parcialmente.
   
8. La llucha idiolóxica y la negativa dafechu a la collaboración col españolismu en cualaquier de les sos espresiones son les ferramientes de les que tenemos que char mano pa torgar el remanamientu –y postrer fundimientu- del movimientu llingüísticu asturianu pol PSOE-IU.

F - PROPUESTES CONCRETES

1. Afitar comu criterios de la campaña la denuncia de la imposición de la Istitución del “Principado” y del “Estatuto de Autonomía”, asina comu les reformes feches al mesmu, cientrándomos nel agraviu comparativu que supón qu’a los asturianos a diferiencia d’otros pueblos nun se mos tea permitío votalu, cola referencia de la falta de democracia que se vive n’Asturies.
   
2. Complementar esi discursu primariu col discursu estratéxicu principal: La falta de Democracia n’Asturies.
   
3. Considerar que l’anterior analís y posible campaña nun tien de ser padrimonial d’Andecha Astur, sinon que ye mui asumible socialmente, inclusu por presones y/o mueganizaciones que nun ten necesariamente nidia la custión nacional. Ello asina:
   
   i. Contautaráse con otres formaciones socio-polítiques al oxetu de da-yos a conocer la nuesa postura y campaña

   ii. Facilitaráse l’alderique en Conceyu Abiertu del presente analís y propuestes, nun entamu al traviés d’internet, y llueu de forma presencial.

   iii. Collaboraráse en toa iniciativa que coincida colos oxetivos equí espuestos independientemente de los convocantes.

   iv. Abriránse víes de collaboración p’aquelles presones y formaciones que compartan l’analís equí desendolcáu y quieran participar na necesaria rempuesta a la situación esistente.

   v. Intentaráse nun patrimoninalizar comu Andecha les iniciatives y movilizaciones, de tala miente que’l restu les formaciones perciban que lo qu’importa son los conteníos y non la rentabilización socio-política de la campaña-

4. Centrar la nuesa actuación a nivel de cai, y de conceyu, considerando les Cases-Conceyu comu la Istitución más prósima a les nueses posibilidaes d’actuación político.
   
5. Ensin perxuiciu de lo enantes reseñao, Andecha Astur dirá entamando les actuaciones sociales que camiente afayaices siempre na llinia de la collaboración y converxencia con otres formaciones, a la gueta d’ameyorar la capacidá d’incidencia social nel necesariu avance haza la normalización democrática n’Asturies.

Añu de la nación galesa nel Intercélticu d'An Oriant

Semeya: Islla de Man Post Office

"Al PSOE vamos acabar reclamándo-y los mesmos derechos y llibertaes que al franquismu"

El PSOE pierde les sigles "s" y "o".
Pablo Fernández, Secretariu d'Organización del Bloque por Asturies
El Comercio

Efeutivamente, el PSOE, sobre too nel nuesu país, perdió los sigles 'S' de socialista y 'O' de obreru, quedando-y d'esta mena tan sólo les sigles de Partido Español (PE), lo cual permite-y un marxen bien afayaizu pal averamientu al ideariu y les polítiques del PP (PE-PP). Esto explica la bona sintonía que hay ente estos dos partidos y explica la zuna que'l PE tien pa col aconceyamientu programáticu con IU-BA-LV. La consecuencia directa d'esto ye'l xorrecimientu ensin precedentes de les polítiques neolliberales que nos azoten nestos momentos a la mayoría de la sociedá asturiana, ya que esti averamientu cada vez más descaráu y ensin complexos hacia estes polítiques neolliberales, tan suponiendo una pérdida de derechos y de calidá de vida como nunca enantes se diera: hay exemplos abondo d'esto qu'acabo de decir, como'l xorrecimientu de les privatizaciones de los servicios públicos, los contratos basoria que se fain a los trabayadores que dependen d'organismos institucionales, les polítiques urbanístiques y ecocides al serviciu de la codicia de los esperteyos de la construcción, l'asimetría fiscal favoratible pa los más poderosos, etcétera. Teniendo too esto en cuenta, prestaríame destacar un casu muy significativu de lo anteriormente dicho, y que non ye otro que'l 'remocique' que se-y quier dar al Estatutu Asturianu. Este remocique, bien de la mano del PE y del PP. Pa ello, el PE fixo un castiellu kafkianu pa defendelu del restu de la sociedá asturiana y, de pasu, dio-y les llaves de la portiella trasera al so collaciu del PP (ya ven pa qué usa el señor Areces el denominau 'votu útil').

Too esto ponse de manifiestu cuando los diferentes actores sociales del nuesu pueblu coinciden en les demandes que-y faen al PE: más participación, más tresparencia, más pluralidá, en definitiva, más democracia (como nun cambien de actitú, al PE va acabar reclamándose-y los mesmos derechos y llibertades que se-y pedia'l franquismo). Los derechos sociales y llingüísticos, per otru llau, queden arrequexaos d'afechu y, polo tanto, pésllase d'esta mena un marcu estatutariu fechu al marxen de la sociedá: too pal pueblu pero ensin el pueblu (¿a qué suena esto?). Asturies nun pue permitiese la pérdida, una tres otra, d'oportunidades pa modernizase y pa ponese'l mesmu nivel de los otros territorios del Estau. Dende esta perspectiva, la 'coreanización' pola que tan sofitando los dirixentes d'esti PE n'Asturies (Areces y Javier) ye abondo preocupante y pon de manifiestu que la pérdida de les sigles del so partido enantes mencionada, non ye casualidá, sinon que respuende a una estratexia perfectamente diseñada, que tien como oxetivu caberu l'algamamientu del poder como sentíu últimu de toes les sos operaciones polítiques.

Por eso, toda cadarma ideolóxica, supón dende esti enfoque de la FSA, un verdaderu pilancu, ya que obligaría a tener que xustificar todes les actuaciones polítiques, y reduciría notablemente'l marxen de maniobra pal desendolcu de les mesmes. La coherencia colos principios ideolóxicos que defende una organización ye siempre una brúxula que pa algunos-yos marca'l camín a seguir, y pa otros les vergüences a tapecer: en definitiva, que'l exerciciu del poder non sería el fin últimu y, polo tanto, lo meyor y más conveniente ye desfacese de too'l llastre ideoloxicu que lo faiga más 'abegosu' P(SO)E.

Abeyando ente'l nacionalismu y el collaboracionismu: Izquierda Xunida

Izquierda Xunida d'Asturies nun alcuentra sitiu nel que añerar y ta principiando a paecese al PP que tanto crítica. La moda de dir al debalu patentada per Ovidio Sánchez, Joaquín Aréstegui, Gabino de Lorenzo... diciendo güei que blanco, mañana de roxo y pasao que prieto va calando na coalición Izquierda Xunida.

A la rebalguina del ritmu que-yos marque'l PSOE, un día glayen, otru rinse y otru lloren; Valledor diz que nacionalismu y referérendum estatutariu, Jesús Iglesias que pautu col gobiernu y no se quien que refundación. Equí tan les declaraciones d'estos díes.

Francisco J. García Valledor:

• Agora lo primero pa Izquierda Xunida, xunto al Bloque y Los Verdes había ser principiar a trabayar na creación d'una fuerza política asturiana nueva a la que s'incorporaren sectores d'izquierdes, ecoloxistes y asturianistes que güei nun tan en nengún sitiu o tan n'otres fuercies polítiques.

Jesús Iglesias:

• Si Areces rectifica, pué haber alcuerdu.

• Cualquier posibilidá de negociación tien que pasar pela revisión y rectificación de polítiques y iniciatives que se punxeron en marcha a lo llargo d'esti añu de gobiernu en solitariu.

Dempués d'esti xaréu, nun somos quien a imaxinar a Alvarez Areces algamando dengún pautu con un Bloque d'Izquierdes Asturianista.

Nun somos quien a imaxinar que Izquierda Xunida d'Asturies (refundada o ensín refundar) seya, como diz Jesús Iglesias, quien a pautar con Areces dempués de lo que tenemos vivío n'estos caberos meses.
La parte "bona" del asuntu ye que zarráu el procesu de reforma estatutaria y consumáu el xenocidiu políticu, cultural y democráticu n'Asturies ya nun habria problema pa tener un conseyeru/conseyera de Cultura d'Izquierda Xunida, d'Andecha o del independentismu irlandés, seguro que'l PSOE diba poneyósla en bandexa de platín.

¿Tará dimpuesta Izquierda Xunida a pasar la páxina del Estatutu?.
¿Ameriten cuálu y cuántu sedría el costu eleitoral?.

PSOE-PP incurren en desacatu constitucional d'inspiración franquista

L'ACONCEYAMIENTU DE XURISTES POL ASTURIANU DIZ QUE LA OFICIALIDÁ DEL ASTURIANU YA TA INSTAURADA POLA CONSTITUCIÓN DE 1978.

PSOE-PP andaron xurgando pela hestoria más llaceriosa del drechu español, la de la dictadura franquista, hasta atopar como desactivar la llingua asturiana nel Estatutu d'Autonomía.

Dende la espublización del llamentable informe encargáu pol señor Areces al Conseyu Consultivu, col qu’entama’l procesu de reforma del Estatutu d’Autonomía, l’Aconceyamientu de Xuristes pol Asturianu vien razonando, una y otra vuelta, dende toles perspeutives posibles y ensin la oposición de naide que sepa del asuntu (mazcayaes d’atrevíos sentímosles tolos díes), que l’artículu 3.2 de la Constitución (“Les demás llingües españoles sedrán tamién oficiales nes respeutives Comunidaes Autónomes alcordies colos sos Estatutos”) instaura la cooficialidá de toles llingües españoles y delega nos Estatutos d’Autonomía, esclusivamente, l’establecimientu del modelu de cooficialidá.

Pal que-y queden duldes al respeutu reproduzse darréu’l criteriu de les Cortes Españoles, espresáu nel Entamu d’una Llei, la 12/2005, pela que se modifica l’artículu 23 del Rexistru Civil:

“El Tribunal Constitucional ha declarado que el artículo 3 de la Constitución supone una habilitación de las Comunidades Autónomas con lengua propia para que, en el marco establecido en sus Estatutos de Autonomía, puedan regular el alcance del concepto de oficialidad (STC 82/1986, de 26 de junio, y 56/1990, de 29 de marzo), lo cual supone establecer el contenido básico de dicha oficialidad (STC 337/1994, de 23 de diciembre) y, además, determinar las medidas que sean precisas para el fomento o la normalización de su lengua propia (STC 74/1989, de 24 de abril, y 337/1994, de 23 de diciembre)”.

Como cualquiera pue apreciar nuna llectura llibre de prexuicios, les Cortes, invocando al Tribunal Constitucional, afiten qu’a los Estatutos d’Autonomía autorízalos la Constitución a regular l’algame de la cooficialidá, lo que quier dicir que la so declaración o reconocencia yá ta fecha n’otru sitiu. ¿Ónde?. Xustamente na mesma Constitución y pente medies de la fras primera del so artículu 3.2 (“Les demás llingües españoles sedrán tamién oficiales nes respeutives Comunidaes Autónomes”) .

Pero l’establecimientu nel Estatutu del algame y conteníu básicu de la cooficialidá de les llingües, al empar de les midíes pal so fomentu y normalización, ye, arriendes d’un drechu, un deber pa los sos redautores porque’l nun facelo, na prautica, camuda en papel moyao la reconocencia constitucional de cooficialidá.

Por embargu, los representantes del PSOE y del PP na ponencia pa la reforma del Estatutu d’Autonomía d’Asturies nun solo se ñeguen a cumplir col mandáu constitucional sinón que anduvieron xurgando pela hestoria más llaceriosa del drechu español fasta atopar dos Decretos franquistes –el 1433 y el 2929, entrambos los dos del añu 1975- que, amestaos, dieron pa un testu, el proyeutu d’artículu 4 del Estatutu, perafayadizu pa desaniciar dafechu, nunos años, la presencia de la llingua asturiana del país onde ñació.

Poro, no que cinca a la llingua, eso ye lo que’l PSOE y el PP ufren a la sociedá asturiana del sieglu XXI: un desacatu constitucional de nidia inspiración franquista.