Mostrando entradas con la etiqueta opera. Mostrar todas las entradas
Mostrando entradas con la etiqueta opera. Mostrar todas las entradas

5/9/08

La Conseyera de Cultura más preocupada poles butaques de dellos abonaos a la opera que de facer del Campoamor un teatru dignu.

  • Cola sida de lo qu'ella noma "crisis del abonáu", (perda del derechu de los abonaos al desapaecer les primeres files y tresformase en parte de la caxa l'escenariu o del fosu de música), pretende hipotecar la Opera d'Uviéu y convertila "nun festival de provincies" hasta polo menos l'añu 2016.
  • Barcelona, Madrid, Sevilla, Bilbao y Valencia esfruten de temporaes de rangu internacional gracies a presupuetos pa programación ya infraestructures apurríos mayormente pol Estáu y que fan que Uviéu, non tan agraciada nin pol Principáu nin pol Estáu, tenga que sobrevivir cola dotación más ruina de toles temporaes operístiques, viendo como a güelpe de talonariu estatal el restu de programaciones escalen posiciones nel mercáu internacional.

La conseyera de Cultura y Turismu del Principáu d'Asturies, Encarnación Rodríguez Cañas, y el conceyal del Conceyu d'Uviéu, José Suárez Arias Cachero, volvieron güei a enfrentase pola financiación y la reforma del Teatru Campoamor. La polémica surdió cuando'l presidente de l'Asociación d'Amigos de la Ópera, Jaime Martínez, reclamó un "esfuerzu" pal espaciu escénicu y plantegó que "falta dalgo" nel teatru.

Tres esta reclamación, l'edil uvieín señaló que'l teatru sevillanu de La Maestranza, con un sieglu menos d'existencia que'l Campoamor, yá foi oxetu de "una reforma completa". Una reforma que contó, según el conceyal, con aportación económica del Gobiernu andaluz. "Uviéu sólo pide un tratu asemeyáu", reclamó Arias Cachero, tres la presentación de la nueva temporada operística.

Estes exixencies algamaron respuesta de la titular de cultura, que señaló que, de facese una reforma na caxa escénica, eso tendría consecuencies pa les primeres files. "Igual eso fuera en detrimentu de les primeres butaques, que son les de los abonaos, creando asina una pequeña crisis", aseguró.

Nesti sen, Rodríguez Cañas recordó qu'hai un añu caltuvo un alcuentru col conceyal nel qu'ésti mostró-y una semeya cola recreación de la posible ampliación de la caxa escénica. "Pero un proyeutu seriu y rigurosu ye muncho más; tenemos que ser rigurosos", criticó.

Asina, la conseyera comentó que "a lo meyor", y coincidiendo cola posible capitalidá europea del 2016 podría falar d'esa ampliación. "Pero hai qu'estudialo, amás tamos nuna situación na que se mos pide austeridá", declaró.

Pero les crítiques del conceyal popular nun sólo quedaron na reforma del teatru, sinón que tamién se dirixeron a la financiación del mesmu. Nesi aspeutu, l'edil declaró confiar en que se "piesllen les resquiebres" de la financiación ente Uviéu y otres ciudaes con teatros d'asemeyaes característiques, en concreto con Bilbao. "Que se cumpla aquello que se dixo", exixó.

Arias Cachero tamién se refirió al incrementu de l'aportación presupuestaria del Principáu al Campoamor. Asina, l'edil reconoció que, anque ésta aumentó nun 50 por cientu, l'actual situación de prollongación torgó qu'esi incrementu s'efeutuare.

"Sí existe una voluntá d'aumentar l'aportación, pero nun se materializó", recordó l'edil, quien añadió que dende'l Conceyu sólo esperen qu'esi incrementu s'aporte esti añu.

14/9/07

Tristan ya Isolde encamina la Opera'n setiembre

R. Wagner: Tristan ya Isolde. Opera d'Uviéu, 2007.
Jon Frederic West, Jayne Casselman, Lioba Braun, Andrew Greenan, Christopher Robertson, Enrique Sánchez Ramos, Guzmán Hernando, Jorge Rodíguez-Norton.
Orquesta Sinfónica del Principáu d'Asturies. Maximiano Valdés (dm). Alfred Kirchner (de).
15, 19 y 23 de Setiembre, Opera d'Uviéu, Teatru Campoamor.


Jon Frederic West y Jayne Casselman darán vida a Tristan ya Isolde nel escenariu del Teatru Campuamor na estrena la Temporada d'Opera d'Uviéu los díes 15, 19 y 23 d'esti mes. Dambos papeles tan consideraos como de los más duros del repertoriu operísticu sobre tóu pa tenor y pa sopranu dramática en cuantu a les desixencies vocales.

Esta ópera de Richard Wagner nun se representaba'n la ciodá dende 1921, añu nel que Walter Kirchhoff ya Elsa Bland dieren vida al noble bretón y a la princesa irlandesa na tormentosa hestoria que tien a Irlanda, a Cornuallles y el so borrinosu mar y al país de Bretaña como marcu nel qu'asitiar tan impresionante lleenda.

La ópera d'Uviéu tamién tien ya preparaos otros títulos pa completar la programación de la Temporada 2007/2008. Thais (Massenet), Lucia de Lammermoor (Donizetti), Efixenia'n La Táuride (Gluck) o Macbeth de Verdi, que pesllará la temporada y tendrá al barítonu andaluz Carlos Alvarez nel papel de xeneral, thane de Cawdor y a lo postrer rei d'Escocia y a Tatiana Serjan nel de lady Macbeth.

Otros cantantes de la escena internacional que pasarán pol escenariu del señeru teatru del conceyu van ser: Lioba Braun, Pamela Armstrong, Reinaldo Macías, Josep Bros, Desirée Rancatore ya Elisabete Matos.

Tamién tará l'escenógrafu uvieín Emilio Sagi que s'acupará de la direición d'escena de Lucia de Lammermoor ya d'Efixenia'n La Táuride.

30/1/07

Xornaes Europees d'Opera n'Uviéu



M. Caballé ye Desdémona, Uviéu 1983.

La Opera d'Uviéu, xunta teatros de toa Europa, cellebra el domingu 18 de febreru les "Xornaes Europees de la Opera".

Con esti eventu preténdese caltener la llume de cuatru sieglos de representaciones operístiques (ye'l 400 cabudañu de L'Orféu de Monteverdi), que güei lloñe d'amortecer, medren enllenando los teatros y auditorios de tol mundiu desaniciando vieyos prexuicios clasistes y conviértense en fenómenu mediáticu, algamando espacios incluso nos medios non especializaos qu'a vegaes les tresporten a les portaes.

N'Asturies, hai a lo llargo l'añu contaes representaciones d'opera tanto n'Avilés como en Xixón. Casu aparte ye'l d'Uviéu, que mantién la única temporada estable del país gracies al entusiasmu del públicu y onde foi posible allegar en pocos años a tres o cuatro representaciones de ca títulu, amás de producciones propies y coproducciones, proyeiciones cinematográfiques, operes pa rapazos, conciertos de nuevos cantantes y conferencies. Tóo ello a pesar de les continues declaraciones de políticos roceanos con tolo que musicalmente s'allonxe del himnu del partíu, y del escosu sofitu de los muerganismos autonómicos incapaces, non ya de dotar de los medios afayaizos a entidades privaes qu'arrecostinen con programaciones culturales que suplen la inhibición de la propia alministración, sinón tamién incapaces d'aperiar un proyeutu de compañía y teatru públicu col qu'albidrar un futuru granible y en condiciones d'igualdá con otros centros operísticos d'asemeyada tradición.

Tornando a la cellebración de les Xornaes, la Fundación Opera tien previsto pal domingu 18 de febreru nel Teatru Campoamor, una maratón de proyeiciones cinematográfiques de representaciones operistíques ente les 11 la mañana y les 11 la nueche. Pola pantalla grande del teatru pasarán (a falta de la confirmación de la entidá Opera d'Uviéu), les filmaciones de los caberos años que fueron trasmitíes en direutu dende'l Campoamor al Auditoriu cola collaboración de Telecable y toes recoyíes en soporte vidiu. Asina podríin volver a vese l'Aida de Giuseppe Verdi, la Elektra de Richard Strauss o la Lucrezia Borgia de Donizetti. Too ello, como digo, pendiente de que l'Asociación Opera d'Uviéu asoleye'l programa.

Tamién nesta cellebración participen otres ciodaes con dixebraos programes:

  • París.- Representaciones de La Xudía (Halévy), Diariu d'un esapaicíu (Janácek), Don Xuan (Mozart), El castiellu de Barbazul (Bela Bartók).
  • Bruxelles.- Proyeiciones de L'Orféu (Monteverdi), Aida (Verdi), Xulia (Boesmans)
  • Llondres.- Funciones de mañán de Mma. Butterfly (Puccini), El Trovador (Verdi).
Entesacamos del interesante Informe de Prensa de les Xornaes (http://www.operadays.eu/files/press-2-fr.pdf) les pallabres d'un gran compositor del sieglu XX:

"La música desixe del espeutador, una preparación y un esfuerzu, salir de casa, aforrar pa una entrada. Desixe'l mesmu esfuerzu pela so parti que de cualisquier otru vértiz del triangulu; esa santa Trinidá que formen el compositor, l'interprete y l'oyenti".
Benjamin Britten.


Facer alcordanza, que mañana dí 31 de Xineru dase la tercera representación de La Traviata de Giuseppe Verdi (Forte-Jordi-Pons) nel Teatru Campoamor y que será trasmitida en direutu a la pantalla de la Sala Sinfónica del Auditoriu. La Temporada 2006-2007 pieslla el día 2 de febreru cola cuarta representación d'esta mesma obra.

La estrena de la Temporada 2007-2008 allegará'l 15 setiembre cola primer representación de Tristan ya Isolde de Richard Wagner.



10/1/07

Opera d'Uviéu. La Traviata (G. Verdi). Díes 27-29-31 de xineru y 2 de febreru. Teatru Campoamor



Violetta Valéry
Cinzia Forte
Alfredo Germont
Ismael Jordi
Giorgio Germont
Joan Pons
Flora Bervoix
M. José Suárez
Barone Douphol
Enrique Sánchez Ramos
Marchese d´Obigny
Juan Manuel Muruaga

Direición musical
Corrado Rovaris

Direición d'escena
Jonathan Miller

Orquesta Sinfónica Ciodá d'Uviéu
Coru de la Ópera d'Uviéu

9/1/07

Actu III. El Caballeru la Rosa (Der Rosenkavalier)



La polémica so la ópera n'Uviéu paez que nun tien fin. Dempués de salir los socialistes ún tres otru intentando catar a vaca escosa, diéron-y la vez al presidente Areces que, total, pa ná.

Agora, Gabino de Lorenzo alcontró'l testigu en suelu y pañolu coles dos manes. Tien tola razón cuando diz que los socialistes tovieron munches oportunidaes pa llucise y dexáronles esnidiase por propiu afatamientu; "oxalá fuereis quien a desdecivos", dixo.

El casu ye que, aprovechando la coyuntura y cual "caballeru de la rosa", promete que sedrá'l hipotéticu gobiernu del PP que surda de les elleciones xenerales nel 2008 el que salve la ópera y l'asitie nel llugar que-y correspuende. Casu contrariu retirarase de la política. Nun diz que vaya dimitir, diz que va "retirase".

Esto del retiru sonábame abondo, si nun hobiere hemeroteques nun se que diba ser de nos, y llévamos al 30 d'avientu pasáu, día nel que un periódicu dá la noticia del "Brindis del Nadal" (¡hala, ya salió la traviata!) y entitulaba asina: "Lorenzo dexa entever que la llexislatura que vien será la cabera" (ver LVA). A esto d'usar la táctica del retiru pa dos casos dixebraos, nel falax financieru nómase "optimizar recursos".

Lo que ta nidio ye que si el PSOE sigue afitando procesos asimétricos (autonomía asimétrica, financiación asimétrica, oficialidá asimétrica, ópera asimétrica, peaxes asimétricos) con toes les comunidaes menos con Asturies, dalguíén va sacar réditu políticu del abandonu y del ningunéu y demostrará que ye porque nun tenemos gaita propia nin nel palcu nin na orquesta.

Tócamos esperar agora a ver quien echa'l telón, porque nin actu, nin cuadru nin epílogu caben ya nesta ópera, salvo que quieran convertila'n zarzuela ( y da-y otra alegría a Gabino y al PP).

En cualquier casu, los responsables de tamañu despropósitu (anque ún de tantos) sábese quien son, los paganos y solmenaos tamién.


8/1/07

Areces: La culpa tienla Aznar




Les sorrealistes declaraciones feches al debalu pol presidente'l principáu so les sovenciones a les óperes d'Uviéu/Bilbao, fan qu'el debate siga allumando y garre puxu.

Yera esperada la salida del presidente a la palestra dempués del circu que montaren Paloma Sainz emponderándose y Fernando Lastra metiendo más ruíu que una mini-moto.

Lo que naide nun podía maxinar yera que la tema podía ponese entovía pior, ya que Vicente Alvarez, écha-y la culpa de la aprebación de los 800.000 euros a la ópera de Bilbao nos presupuestos del estáu pal 2007 a los pactos d'Aznar col Partíu Nacionalista Bascu (PNB). Pero que ye ésto, oh!, ¿será qu'el presidente carez de la memoria?

Esti señor (J.M. "Ansar") yera cabezaleru del PP, partíu que perdió les caberes elleciones y quien les ganó y formo'l gobiernu, que ya va pa tres años, foi ZP (¡al ataque..!), y la enmienda qu'había aprobao'l Senáu (PP + nacionalistes catalanes) aperiando distingos ente Uviéu y Bilbao nesos 8oo.ooo euros, cháronla a rodar caleyón abaxu'l PSOE + nacionalistes bascos (PNB) + nacionalistes gallegos (BNG). Ai!, pa la memoria hai que comer más pescao!.


Podemos falar del restu de les inversiones, como fai el presidente, destinaes a la ciodá d'Uviéu, pero la rialidá ye que nun fai tantos años Uviéu y Bilbao teníin, al empar, la segunda temporada d'opera del Estáu (per calidá, cantantes, númberu d'operes presentáes, númberu de funciones...) a les qu'adelantaba namás Barcelona, y agora per mor de les sovenciones, a Uviéu ya la entepasen el propiu Bilbao, Madrid, y no tocante a poderíu económicu, qu'el artísticu ye más que discutible, Valencia y Sevilla que a golpe tamién de perres públiques pasaron de tener tol prau pacíu a asitiase al ras de los grandes d'Europa. Ni que decir tien, que toes estes ciodaes tienen desllumantes teatros d'opera, espeutaculares auditorios, muséu de les belles artes, d'arte contemporaniu, como poco dos o tres canales de televisión autonómica en llingua propio y dalguna hasta un teatru nacional, tóo ello con aportación estatal.

Vamos tratar llargo d'equí a les elleciones de mayu d'esta mesma tema, peru énte l'autismu del parlamentu español, la rellambida
(dolce) galbana de Paloma Sainz, les bocayaes de Fernando Lastra y les absurdes manifestaciones del presidente, nun queda otra que dicir: ¡¡¡ YE PA DALO A VOCES...!!!


Mariella Devia y Josep Bros. Donizetti. Lucrezia Borgia. Opera d'Uviéu - 2004

Melodrama, griesca y nepotismu

6/1/07

La Opera xúbi-y los colores a la candidata socialista



La Fundación Opera d'Uviéu asoleya güei sábadu nun mediu uvieín, una carta dirixida a la candidata socialista al Conceyu nes prósimes elleciones, na que esmonta toles argumentaciones que nun artículu d'opinión apaecíu díes enantes nel mesmu mediu, la propia candidata Sainz xustificaba la bayura perres de diferencia que nos presupuestos del estáu del añu 2007 (y tamién nos anteriores), se-y apurren a temporáes d'opera'n dixebraes comunidaes y'n concretu a la ópera de Bilbao en comparanza coles que se-y asiñen a la temporada d'ópera d'Uviéu.

Sainz, aficionada a la ópera (sigún éstes y anteriores declaraciones feches al mesmu mediu), dexa entever falta de proyectu cultural, de aiciones de fomentu, de novedaes en títulos, producciones etc. Rescampla cierta dexadez en collaboración de la Opera con otres instituciones de fomentu o ensiñanza de la música, asina como falta d'averamientu a rapazos ya mozos.

Tóes estes apreciaciones de Paloma Sainz ye lo que la propia Opera consigue desmontar cola so carta de rempuesta como si d'un decoráu del Falstaff de Verdi o de la Serva Padrona de Pergolesi se tratare, pieza a pieza ya puntu per puntu, demostrando que se fái éso y muncho más.

Cuántaya, n'aquel famosu llibretu "Construiyendo Asturies", ya Paloma Sainz facía unes declaraciones nes qu'espeyaba qu'el tema musical ye de los sos favoritos; dáquella dixo que yera el gobiernu autonómicu l'únicu braeru sofitu de la ópera.

Tamién tien unes palabres la Fundación Opera d'Uviéu pa unes desnortiaes declaraciones propio de xentecaya, feches pol portavoz del PSOE Fernando Lastra nes que recomendaba a los socios de la Opera d'Uviéu facer aportaciones del so bolsu si queríin una bona temporada. A tóo esto nel escenariu (Congresu los Diputaos) represéntase y dáse-y preste per parte'l PSOE a una suba'n 800.000 euros na sovención a la Asociación Bilbaína d'Amigos de la Opera.

De xuru qu'entovía nun va cayer el telón, retrucará el PSOE, de seguro. Lo deseyable sedría que quien representare'l papel nel prósimu actu seya un poquiñín más sensible que la candidata Sra. Sainz o'l diputáu de la Xunta Xeneral Sr. Lastra pa cola música, cola ópera, cola cultura, cola igualdá, cola verdá y col ciodadanu, seya ésti últimu contribuyente pa cola alministración del estáu o pa cola Diputación Foral de Bizcaya.