COMUNICAU DE LA XUNTA POLA DEFENSA DE LA LLINGUA
En viendo los estorbos que se ponen de contino nos centros d’enseñanza, tanto de Primaria como de Secundaria pa col enseñu del asturianu, la Xunta pola Defensa de la Llingua Asturiana fai un llamáu a tola xente que tenga conocimientu de casos nos que la opción llibre de cursar estudios d’asturianu la deniegue dalgún centru educativu.
La presencia del asturianu na educación ye marxinal y testimonial, dase una situación d’agresión continua a los derechos llingüísticos y educativos de los y les estudiantes, y un incumplimientu sistemáticu de la llexislación esistente n’Asturies nesti campu. Esto traduzse en que, cursu tres cursu, niégase’l derechu a estudiar la llingua asturiana a miles de mozos y moces estudiantes que lo piden voluntariamente.
Nos últimos díes, foi posible resolver un casu nun institutu de Xixón nel que se negaba la opción de cursar asturianu a dellos estudiantes que lu hubieren pidío. Depués de facer les xestiones correspondientes, foi posible iguar esta situación y que finalmente el centru accediera a ufrir l’asignatura. Sabemos que nun ye l’únicu casu y que en munchos d’ellos podríemos tar en condiciones d’actuar de lleganos la información en tiempu.
Por eso, encamentamos a tolos estudiantes, families, trabayadores de la enseñanza y a cualquier persona que pueda tener información sobre esti tipu de situaciones, a que se pongan en contactu cola Xunta pola Defensa de la Llingua Asturiana pa denunciar y actuar contra estos fechos.
Comunicáu de la Xunta pola Defensa de la Llingua
Esti añu cúmplense diez de la llegada a la presidencia del gobiernu d’Asturies de Vicente Álvarez-Areces. Dende la Xunta pola Defensa de la Llingua Asturiana creyemos que ye un momentu bonu pa recordar lo que foi la so política no que se refier a la llingua asturiana.
Nesta década, la situación xeneral del idioma foi de mal en peor, col perconocíu retrocesu nel númberu de falantes al cortase la tresmisión interxeneracional y la falta de derechos fundamentales de les persones qu’usen l’asturianu. Asistimos, inclusive, a la persecución de l’Alministración a ciudadanos qu’escueyen llibremente la llingua asturiana pa la so vida normal.
La política arecista, nesti tiempu, nun foi nunca a pasar de les declaraciones d’intenciones retóriques y vacíes, de les visiones de la llingua museístiques y acomplexaes. Too ello traxo como consecuencia unes actuaciones llingüístiques pa cubrir l’espediente, omitiendo les sos obligaciones y, munches veces, tomando decisiones, por acción o omisión, perxudiciales pal futuru del idioma. Nun se vio nenguna midida efectiva p’ameyorar la situación del asturianu nel sistema educativu (sigue la precariedá en tolos niveles), nos medios de comunicación (con una presencia marxinal nos medios públicos) y nos diferentes organismos de l’Alministración (qu’escaecen sistemáticamente lo necesario que ye la tresversalidá de les polítiques llingüístiques).
L’avance producíu cola oficialización de la toponimia de dellos conceyos, exemplu de participación ciudadana y procuru técnicu, vese burlláu de contino pola falta sistemática de cumplimientu poles propies instancies del Principáu y poles entidaes vinculaes directamente a ésti (la Radiotelevisón del Principáu d’Asturies, Caxastur... ente otres).
Por eso, cuando ta acabando la triste y buxa etapa d’inoperacia política del arecismu, pidimos a les persones y partíos que nel futuru tengan responsabilidaes de gobiernu n’Asturies que tornen esta situación de desigualdá xurídica de la ciudadanía declarando la oficialidá de la llingua asturiana. De la mesma manera, habían ser quien a llibrase de les polítiques culturales inútiles y megalomaniátiques, y axeitar unes polítiques llingüístiques series, realistes y eficaces que permitan al idioma ganar falantes y espacios d’usu, asegurando asina’l so futuru.
Fonte| Xunta pola Defensa de la Llingua Asturiana
Nel Aconceyamientu de Xuristes pol Asturianu nun mos casaba lo que se cacarexaba colo que’l BOPA ponía, asina que, tres estudiar con procuru l’asuntu, iguamos un comunicáu esplicando que lo que s’espardía nun yera verdá; que’l Gobiernu del Principáu nun creare nengún muérganu de traducción; y que de too ello nun había más cosa real que l’alloriante pretensión de “carga-y la torna de los testos asturianu-castellán a un funcionariu al que nun se-y desixe la conocencia de la llingua asturiana pal accesu al puestu de trabayu”.
Como hebo medios de comunicación que nun mos creyeron, buscamos la llaga pa que pudieren meter los deos y, a nun tardar, atopémosla: la Xefa del Secretariáu del Gobiernu del Principáu, vien de certificar que “no se aprobó ningún acuerdo específico de creación de una Unidad de Traducción en la Dirección General de Política Lingüística de la Consejería de Cultura y Turismo”.
Ye la segunda vegada, en poco más de seyes meses, que l’Aconceyamientu de Xuristes pol Asturianu atrapa a la Direutora Xeneral de Política Llingüística afitando públicamente lo que nun ye (la otra foi alrodiu de la resolución del Conseyu d’Europa sobro l’aplicación n’Asturies de la Carta Europea de les Llingües Rexonales o Minoritaries). Nun país onde braeramente se respete a la verdá y a les minoríes (nesti casu llingüístiques), dos de los pegollos nos que se sofita -sine qua nom- el sistema democráticu, yera de sobra pa ser cesada darréu.
N’Uviéu a dieciseyes de xunu de dos mil nueve.
Pola Xunta Direutiva del Aconceyamientu de Xuristes pol Asturianu, robla’l so Presidente, Xosé María Estrada Janáriz, n’Uviéu a venti de xunu de dos mil nueve.
