Como Conseyera de Cultura la Sra. Ana Rosa Migoya yera lega na materia, amás de contraria a la llingua y a toes les manifestaciones de la cultura asturiana que tanto desconocía. Como Conseyera d'Alministraciones Públiques agora ya sabemos que de nueves tecnoloxíes, infraestructures, interpretación de datos y comunicación tamién acoxica abondo.
Hai más de venticinco años que los parllamentos de Galicia, País Vascu, Navarra, Cataluña, Valencia y les Isles Baleares incluyeron nos sos estatutos d’autonomía’l reconocimientu oficial de les sos llingües propies. D’esa manera garantizaron a tolos sos ciudadanos el derechu a usar y conocer la so llingua y convirtieron el so patrimoniu llingüísticu nun dinamizador social y económicu bien potente. Les bondaes d’esta midida foron tán evidentes qu’angüaño nengún de los grupos políticos con representación nesos parllamentos taría dispuestu a renunciar a la oficialidá.
Sicasí, n’Asturies siguióse’l camín contrariu. L’Estatutu d’Autonomía d’Asturies nació de la mano d’una clase política provinciana que quixo borrar de la hestoria la nuesa realidá llingüística y cultural.
Venticinco años depués siguimos igual: l’asturianu ye la única llingua del Estáu que tovía nun ye oficial. Añu tres añu siguen apaeciendo casos de discriminación pol usu de la nuesa llingua, l’asturianu sigue teniendo una presencia marxinal -dacuando hasta como motivu de risa- nos medios de comunicación, nel sistema educativu, nes alministraciones, etc.
El resultáu ye que los asturianos somos los únicos ciudadanos del Estáu que nun tenemos reconocíos los nuesos derechos llingüísticos y que por eso, si siguen les coses asina, la llingua asturiana ta condenada a desapaecer ente la marxinación y la vergüenza.
Nestos díes, los grupos parllamentarios representaos na Xunta Xeneral tán nes negociaciones pa otras reforma del Estatutu d’Autonomía. Nun podemos dexar que vuelvan zarralu en falso: la nuesa llingua tien que ser oficial, como les demás. Nun podemos dexar que por culpa d’unos intereses partidistes irresponsables condenen a muerte a una llingua que pertenez al nuesu pueblu dende va más de mil años.
Por eso, la Xunta pola Defensa de la Llingua Asturiana quier convocate a la manifestación que vamos entamar el vienres 9 de mayu, Día de les Lletres Asturianes, y que va salir a les 19:00 hores de la Estación del Norte d’Uviéu.
PORQUE TAMIÉN YE TUYA, L’ASTURIANU LLINGUA OFICIAL, YÁ
El Conceyu Abiertu pola Oficialidá ta yá espardiendo los materiales pa la convocatoria d’una marcha ciclista pola oficialidá en Xixón. Una ocasión inmeyorable pa sacar la bicicleta a la cai y dar unes pedalaes -reivindicatives- pola oficialidá de la nuesa llingua.
La marcha, que va facese esti domingu 4 de mayu, va salir a les 12:00 de xunta la estatua de Pelayo, na Plaza’l Marqués de Xixón.
"La Nueva España" principia a facer emplegu del términu "ría de Ribadeo", pa denominar a la llende d'Asturies pol oeste.
