Alvaro Cuesta amenaza a los asturianos con que la so llingua perxudica'l desendolcu económicu.

Foi nel caberu programa de La Lupa na Canal 10 d'El Comercio y Vocento. El candidatu pol PSOE, Alvaro Cuesta, nel más netu estilu paternalista y enchipáu de teunócrata facista, echó la llingua a pacer, mintió gravemente y en un escomanáu exerciciu de prepotencia amenazó a los asturianos colos pelligros que sigún esti "demócrata socialista" diba traenos la oficialidá.

• Diba suponer una torga a "la llibre competencia".

• Perxudicaría la capacidá d'apertura, promoción y enerxía pal desendolcu económicu d'Asturies.

Tolo contrario de lo que firmaren nel documentu aprebáu nel Congresu qu'espeyaba les bondaes del billingüismu nes comunidaes con llingua propia oficial.

Tamién se dexó dicir esti camarada señoritu, que falar del mundu rural y facelo n'asturianu yera "degradante". Pa terminar tampoco vía necesidá de cambiu dengún nel Estatutu d'Autonomía.

Asturies sigui siendo'l paraísu socialista de la manipulación, del engañu, de la discriminación, de les amenaces polítiques y de la inseguridá democrática.

Pilar Fernández Pardo (PP): Respeuto a la llingua tenemos el mesmu discursu n'Asturies qu'en Cataluña.

El programa La Lupa na Canal 10 de Xixón entrevistó esti martes día 4 a Pilar Fernández Pardo, candidata al Congresu pol Partíu Popular y presidenta d'esti partíu en Xixón. Tamién ye Patrona d'Honor de la Fundación Caveda y Nava.

Les sos declaraciones espeyen lo que puede ser a partir d'agora el puntu de partida del Partíu Popular en materia llingüistica pala reforma del Estatutu d'Autonomía, y son les que vienen darréu:

• Hai que puxar pola llingua asturiana y pola cultura d'Asturies, facela oficial, pero ensin obligatoriedá.

• El que quiera falar o escribir n'asturianu lo mesmo nel ámbetu oficial que nel priváu tien que lo poder facer llibremente.

• Hai que posibilitar l'ensiñu y l'emplegu de la llingua pero ensin obligar a naide.

• Si un xuez quier facer usu de la llingua nes sos sentencies o un ciudadán ante les alministraciones tienen que poder facelo, toos entendemos perfechamente l'asturianu, pa mín que nun diben facer falta traductores, pero si tien qu'habelos...

• La oficialidá tien que dir nel Estatutu y la ponencia creada na Xunta Xeneral pa la so reforma ye onde los partíos políticos tienen que falar nidiamente de lo que quieren pal futuru y nesti sen la llingua ye un finxu fundamental.

• Esti ye'l mesmu discursu que tenemos en Galicia, en Valencia, onde falen gallegu y valencián, o en Mallorca o en Cataluña, nun ye contrariu al discursu del PP.

Izquierda Xunida-Bloque tamién sal a cortexar el votu asturianista

Les Noticies:

Lo que se ta viendo ye que los votos asturianistes cada vez son más importantes y tán tomándose en consideración. Gabino de Lorenzo pidía ayeri n'Onís el votu asturianista, inclusive'l votu asturianista d'esquierdes, pa defender la llingua asturiana.

Rafael Palacios (Izquierda Xunida-Bloque por Asturies): Por fin empieza a valorase'l votu asturianista. Esto ye debío a que tamos faciéndonos visibles pa la sociedá con claridá y eso nun ye malo. La situación d'agora ye esta: l'asturianismu d'esquierdes ta alredol d'IX-Bloque por Asturies-LV y l'asturianismu de dereches alredol del PP. Otra cosa ye que se pierda'l norte, como fai Gabino, y venga buscar votos na esquierda, onde nun los va tener. Nós, nel Bloque por Asturies, alegrámonos d'esti pasu alantre del PP. Desgraciadamene'l PSOE nun lu dio. Lo que-y decimos a Gabino de Lorenzo ye qu'esto nun quede nuna petición electoralista y que vaiga más allá, que la mantenga y sía coherente. Pidímo-y al PP que salga claramente defendiendo la oficialidá de la llingua asturiana, y depués discutimos cómo y de qué manera. Pero diba ser bono que se posicionaran claramente de cara a la reforma del Estatutu. De cualquier manera, dende'l Bloque por Asturies defendemos el consensu alredol del asturianu; que'l PP se posicione como nós favorables a la llingua asturiana nun nos puede más que satisfacer. Ye una bona noticia. Vamos ver si el PSOE refloxona. La situación d'empate técnicu que se da ente PSOE y PP ye posible desfacelu dende l'asturianismu d'esquierdes. Lo que-y pido a esi asturianismu d'esquierdes ye que se posicione y que vaiga a votar a IX-Bloque por Asturies-LV. Podemos romper esi empate, somos los únicos que podemos romper esa inercia, y podemos forzar a que los grupos se vaigan posicionando a favor del asturianu. La pena ye que la FSA siga calteniendo eses posiciones cerriles contra la llingua y la cultura d'Asturies. Nun me pregunté por qué tienen esa posición: nun soi a entendelo.

Entesacao de la web de Les Noticies

Gabino de Lorenzo pidi en Cangues el votu asturianista.

Gabino de Lorenzo Ferrera pidió-y el votu esti domingu a los nacionalistes "anque se nomen d'izquierdes, porque queremos lo mesmo que vosotros" y fízolo dende Cangues d'Onís, la antigua capital histórica d'Asturies.

"Vamos defender el país, la so llingua, el folclor y la so cultura" dixo el candidatu del Partíu Popular y añedió que "falo asturianu porque me da la gana, anque los socialistes echen fumu cá vegada que digo una pallabra n'asturianu".

Hai que reconoce-y a Gabino de Lorenzo que ta camudando el llinguax al que mos teníen avezaos nes campañes postreres. Al discursu de la "oficialidá ensin obligación", qu'amas de Lorenzo ya glayen otros dirixentes populares, amestase agora el guiñu al asturianismu y la proclama a "defender el país".

Seya el que seya el resultáu de les eleiciones, el PP va tener que ser consecuente con tolo que dixo nesta campaña, va a tener que repetilo, d'esplicalo, matizalo y convencer. Nun vamos escaecer un res de lo que se dixo y se dirá entovía nesta selmana.

Asina les coses, el "día dempués" plantégase abondo interesante. La prósima reforma del Estatutu d'Autonomía, con una FSA-PSOE enllamargada nel más ranciu españolismu casposu conocíu, una Izquierda Xunida recién proclamada autónoma y asturianista y un PP envalentonáu y que tamién se proclama tanto o más asturianista que naide, podía camudar la dinámica de "cuesta abaxo ensin frenos" a que mos tien condenaos la FSA-PSOE y podíemos cuntar colos deos de una man los meses que-y quedaríen al gobiernu Areces.

Sigún les encuentes solo'l PP y'l PSOE unviarán a les "cortes" representantes d'Asturies.

Los ocho diputaos y cuatro senadores qu'Asturies unviará a les Cortes Españoles van ser, sigún les encuestes asoleyaes, toos del PP y del PSOE.

La engarradiella ente dambos partíos y la falta de mensaxes de calao nun amedrana a los votantes qu'escoyerán a los murnios representantes del bipartidismu que nieguen qu'Asturies pueda algamar los mesmos niveles de llibertá, d'autonomía, de derechos y de desarrollu económicu, social y cultural que los demás pueblos del estáu.

Afítase asina lo que dellos espertos nomen "falta de dinamismu políticu-social d'Asturies" y qu'en pocos años mos llevó de ser activistes y participantes de tolos cambeos políticos, sociales, artísticos y culturales, a ser, nos caberos años gracies a esta "secta política" que nosotros mesmos cebamos, los cabezaleros del inmovilismu, la indolencia y de la mayor regresión social, económica y cultural del ámbetu européu.

"A la FSA cualquier cosa relacionada cola cultura asturiana fiede-y a cuchu"

Esti vienres el selmanariu Les Noticies fala col alcalde d'Uviéu y candidatu del PP a les elleciones españoles Gabino de Lorenzo y lo que diz, paez que va marcar un nueu camín nel posicionamientu de los populares al respeutu del problema llingüisticu n'Asturies, a la vez que, de confirmase, dexará al PSOE solu y arrequexáu nel so estremismu radical, sectariu ya insolidariu d'aniquilación llingüistica y cultural del pueblu asturianu.

Les Noticies

Asturies: panorama nacional.

Ventiún de febreru: Día de la llingua materna.

L'UNESCO tien establecío esti día internacional
como una xornada pola defensa de les llingües minorizaes.

N'Asturies ye seña
d'otru añu ensín derechos...

PhotoTop: Llampaya (Conceyu d'Uviéu)

El xelu y la nieve asomen pola Peña L'Aramu

L'Aramu y'l Picu'l Monsacro dende Villamar (Uviéu). 31 Xineru 2008.