El diariu l'Avui de Cataluña aconceya colos sos llectores pola oficialidá del asturianu.

L'Avui dixital 24 Payares 2007

Javier Fernández nin ye internacionalista, nin cosmopolita. Les sos pallabres retrátenlu.

Javier Fernández, Secretariu Xeneral de la FSA-PSOE diríxese a les Mocedaes Socialistes (organización inxertada nel Conceyu Abiertu pola Oficialidá), tracamundiando oficilidá, emigración, cosmopolitismu y nacionalismu:

1.- Rechazamos la imposición que supone la oficialidad.
2.- Somos cosmopolitas, como se demuestra en los últimos tiempos ante el constante aumento de la inmigración.
3.-Los nacionalistas no es que pretendan mandar en su casa, es que pretenden que allí sólo vivan los suyos.
El Comercio

24 payares, un país na defensa la so llingua

La FSA-PSOE como problema

Luis Arias fai güei, xueves 15 Payares, un repás a dellos de los "llogros y propuestes" de la FSA-PSOE n'Asturies.

Nun tan toos, porque sería perabegoso y nun cabríin nes milenta páxines de tolos periódicos la fartá propuestes, mediu propuestes, proyeutos, decalaraciones que la FSA y los sos cabezaleros ficieron y fan en contra siempre de los intereses d'Asturies, en tolos temes, dende l'Estatutu, a la varianti del Payares, pasando pola llingua y la cultura propio, en temas d'ecoloxismu, incluso en temes de defensa del territoriu donde la so dexadez ye patente (acordase equí d'aquella famosa propuesta que pretendía declarar patrimoniu'l mundiu una perimportante parte de la cultura asturiana faciéndola pasar per gallegu-portuguesa y que tovieron que torgar los d'Andecha y la sociedá civil qu'inundó la sé de l' UNESCO de mensaxes de corréu) y el so fin - ensín ánimu de teorizar cospirativamenti - y si se siguen con procuru los actos y declaraciones del presidente Sr. Areces, ye desasturianizar el territoriu y castiellanizar per una fastera y dexar galleguizar pela otra. La fórmula máxica del divide y trunfarás, qu'amás alcontró melgueru sofitu en dellos asturianistes apegaos al poder que xueguen a engatusar, empatonar, enllamargar con lentísimos procesos como'l de la recuperación toponímica y que fan de llaváu de cara pal gobiernu y tamién de muria énte les propuestes más progresistes y normalizaores que surden de la sociedá y que nun son quien a trespasar la barrera que formen políticos desarraigaos heriedes del centralismu, y altos funcionarios qu'atoparon nesti virreinatu un llugar favoratible pa medrar col amparu del "socialismu integrador ya internacionalista" cola collaboración interesada de medios de comunicación febles, mansulinos y combayones pol mor de les sovenciones y la so "graciosa" participación (casu únicu nel mundu), nos medios públicos (lléase TPA). Un conglomeráu d'elites polítiques, económiques y sociales bien asitiaes pa les que lo importante ye "primar lo que los xune (los privilexos), y desaniciar lo que los separta" del restu de la sociedá: la igualdá, el drechu a la identidá, a la llingua propia, la participación y la democracia.


L'artículu de Luis Arias:
Ave, FSA. En LNE, xueves 15 Payares.

"Pasarela Escandalera" OR "L'Antroxu n'ochobre".

La seronda tráinos como siempre les castañes, los amagüestos y dende hai unos años pacá los "Premios Príncipe de Asturias", gracies a la torna del nome al francés agora tamién d' "Asturies".

Ye algo que nos vieno, asina, ensin querelo, y ye la oportunidá pa que los poderes políticos, económicos, de la cultura oficial y la comunicación, tamién oficial, puean vese y dexase ver xunta la nobleza nel Campoamor y nel Reconquista, y pa otra xente la sida p'amontonase na puerta a papiar fríu, volar banderes, tirbulinos y glayar fataes coles qu'enllenar les páxines de la prensa "provincial".

La utilización que se fai de les bandes de gaites y de los grupos folclóricos (que son parte de la cultura asturiana, siñores), convirtiéndolos en meros pasacáis, comparses y pasilleros de "Pasarela Escandalera" ye d'atristayar. Impensable notres fasteras nes que la cultura propio y les tradiciones cuntien col sofitu de los sos representantes.

Non contentos con tol xaréu que monten na vetusta capital, ca añu con una llimosna de trenta mil eurinos entamen una romería en cualisquier conceyu que te dimpuestu a rendiyos pleitesía, convertise en "pueblu exemplar" (¡diosla, que nomatu!) y representar un paripé con guah.es con montera picona antroxada de tricorniu, Puya'l Ramu de zarzuela madrilana y Brigada de Salvamentu de preba del "gran hermanu".

Tolos esfuercios de recuperación cultural, llingüistica, musical, de vezos y costumes, de festeyos y vistimenta tradicional, fechos cerella nuna selmana d'ochobre qu'ensalza les cultures de mediu mundu y arrequexa, escaez, trivializa y hasta denigra a la cultura d'Asturies col silenciu complice de los cargos y representantes políticos de la Comunidá Autónoma (llamatives les sos sorrises combayones, preocupaos namás porque se-yos note, y muncho, l'esbabaye que-yos arroxa peles camises, polos anacrónicos paxellos de xastre postineru y poles corbates, fasta entafarrar les alfombres y moquetes.

Too esto resumiólo un rapacín de Moréa qu'alguién quixo que fora obediente figuranti con montena "rojigualda", y él, decidíu, revelose:

Rapaz (a la so má):
- Mama, tengo un poco fame...

Rapaz (a un príncipe):
- ¿Tienes patates?

Un príncipe:
- No te preocupes, ahora comemos patatas.

Caliao, la gran mentira, trespasa les llendes.

Nuberu convierti'l silenciu nun glayíu pola oficialidá y escontra la desidia de les mudables casties polítiques

Marchamos cansaos de facer defensa del asturianu frenti a compañeros de trinchera que dexaron de tener compromisu cola reivindicación que yera la nuestra bandera.

Defraudaos de ver a compañeros colos que compartimos viax nestos caberos años, y agora que gobiernen nesta tierra apoderolos l'amnesia, porque son ellos los que tienen nes sos manes que la llingua na que canto seya oficial.

Lleer les declaraciones enteres de Chus Pedro na LVA.

Atiendi, Asturies, atiendi.
lo que falo na to fala
anque nos oyíos tengas
muncha llingua castellana.

Sé que sofristi abondu
que fusti más nueche qu'alba
que fixisti too dafechu
lo que sentíes pel alma.

Selo bien, pero'l dolor
golviósete una mordaza
dexándote a fuerza sombra
una llaceria na fala.

Esa llaceria espardióse
comu una postiella gafa
fendió to llingua llariega
fasta torgate falala.

Y la hestoria que pulsiasti
cola pallabra bien alta
quedando fo callandina
como ensin acordanza.

Y ensin acordanza un pueblu
nun tien futuru a la llarga.
Atiendi, Asturies, atiendi
lo que falo na to fala

Manuel Asur.

La oficialidá del asturianu ye la única reivindicación que se caltién viva y medra de magar hai democracia.

La Xunta pola Defensa de la Llingua prendi mecha pola oficialidá nel Estatutu.

Col motivu del empiezu del calandariu de reuniones ente los grupos parllamentarios pa la reforma del Estatutu d’Autonomía, la Xunta pola Defensa de la Llingua Asturiana convoca una concentración col lema "Na Reforma l’Estatutu, L’Asturianu Llingua Oficial".

La concentración va facese a les 11:30 d’esti vienres 5 d’ochobre delantre de la Xunta Xeneral, na cai Fruela d’Uviéu.

Los dirixentes del PSOE nun dan abastu.

Les comparecencies de los dirixentes del PSOE na Xunta Xeneral, nel Alderique d'Orientación Política, y na Audiencia, pola supuesta pretensión de cobru de comisiones illegales nel asitiamientu d'un hipermercáu'n Llangréu(el nomáu "casu Campelo"), failos ser el centru d'actualidá en tolos medios d'Asturies.

Tantu poder algamáu trái consecuencies, refiérome a nun dar abastu; sicasí paecen atopase tanto na feria como nel mercáu... ¡xente de mundiu, siñores!.

Fernando Lastra, M. José Ramos, Ana Migoya y V. Alvarez Areces na Xunta Xeneral

Jose Angel Fernández Villa y Javier Fernández, un fumando'n pipa y l'utru sentáu esperando pa declarar.