asturianoscontraareces.com denuncia los problemes de la mocedá asturiano frente al autobombu del presidente

La organización de mocedá arreyada al partíu Izquierda Asturiana, enxertáu na coalición UNIDÁ, amuesa'l so plasmu y repulsa énte una nueva aición propagandística y electoral encubierta del PSOE y de Tini Areces, una práctica que vien siendo yá habitual nos últimos meses, cola presentación de la supuesta iniciativa ciudadana “Asturianos por Areces”.

Nesta ocasión la campaña céntrase na figura del propiu presidente, Vicente Álvarez Areces, quien asistió personalmente a la presentación oficial el martes 10 d'Asturianos por Areces, que s'autodefine como “un grupu d'asturianos y asturianes que buscaben un cauce pa que cualesquier ciudadanu pudiere falar de tu a tu con Vicente Álvarez Areces”.

Curiosamente, la páxina web que concentra la información sobre la actividá d'esta organización da más la impresión de ser d'una especie de panexíricu qu'inclúi apartaos como un espaciu de semeyes de xente col presidente, amás d'un blog escritu pol propiu Areces, dalgo mui sosprendente pa una asociación independiente como diz ser esta. Amás resulta “chocante” que’l dominiu propiedá de “Asturianos por Areces” seya l’únicu non rexistráu pol Gobiernu del Principáu como sí lo son los d’estensión .com, .org, .net etc.

El secretariu de nueves tecnoloxíes de mias>>, Xuacu Rodríguez, afirmó que “ye inaceptable la continua apaición d'esti tipu d'actos promocionales que pretenden a les clares engañar a la ciudadanía, lo cual amuesa amás el fondu despreciu que tienen los sos responsables pa colos asturianos y asturianes”.

Amás, Rodríguez destacó que “nos paez mui preocupante'l calter d'esaltación de la figura d'Areces que tien el web, nel que se fala del presidente con una grandilocuencia escesiva dafechu, como si d’ún semidios se tratare, dexando de lláu los pergraves problemes que carez Asturies y la so mocedá, que se ve obligao a emigrar forzosamente en decenes de miles tolos años pa vivir dignamente, anque él siga falando de lleendes urbanes, “probablemente la peor nos últimos trenta años pa la xente más moz.”

Ye por ello que dende Mocedá d’Izquierda Asturiana rexistróse’l dominiu en custión www.asturianoscontraareces.com, un sitiu onde recoyer el descontentu de la mocedá pa cola xestión del gobiernu del PSOE-IU d’esti país, dirixida por un presidente que sigue faciendo negación de los nuestros problemes y tomándonos por tontos”, indicó’l representante de mias>>.

Villa acusa al Gobiernu d'Asturies de facer polítiques escontra la democracia, el pluralismu y la llibertá d'espresión

El Seretariu Xeneral del SOMA-FIA-UXT, José Angel Fernández Villa, acusó güei al Gobiernu y al so Presidente Alvarez Areces, de tomar decisiones polítiques que van escontra la democracia, el pluralismu y la llibertá d'espresión, en cuenta del pieslle ordenáu pol excutivu asturianu de la canal de televisión "Teleasturias".

Fernández Villa foi senador pola Comunidá Autonóma d'Asturies na pasada llexislatura 1999-2003 y agora ye diputáu na Xunta Xeneral elexíu na llista del PSOE. Nun se presenta na candidatura pa les elleciones autonómiques del 27 mayu, nuna decisión que dellos nomaron política y otros personal, pero ésti nun ye el primer enfrentamientu políticu ente el lider sindical y el presidente Areces.

Estes declaraciones en plena precampaña ellectoral nun van sentá-yos mui bien a los cabezaleros de les llistes socialistes, Areces, Javier Fernández, Migoya y Lastra.

Villa terminó les sos declaraciones desta mena: "El Gobiernu tien que rectificar la so decisión"

La Xusticia anula'l Plan Urbanu del Conceyu Llanes a instancies d'Andecha Astur.

El Tribunal Cimeru de Xusticia d'Asturies ta acabante anular el Plan Xeneral d'Ordenación Urbana del Conceyu de Llanes per nun s'axustar al orde xurídicu. Esti plan ye continuación del anterior plan urbanísticu de Llanes (tamién anuláu polos tribunales de xusticia) y redactáu nos años noventa pol gobiernu socialista del conceyu presidíu per Antonio Trevín, güei Delegáu del Gobiernu español n'Asturies.

El recursu presentóse a instancies d'Andecha Astur escontra un acuerdu del añu 2002 del Plenu de la Comisión d'Urbanismu ya Ordenación del Territoriu (CUOTA), muérganismu del Principáu d'Asturies encargáu de la vixilancia de la llegalidá urbanística nos conceyos, y que-y daba preste al Plan Xeneral ensín que les nueves normes subsidiares del conceyu fueren sometíes a información pública dempués de ser anulaes les anteriores pol Tribunal Cimeru de Xusticia del Estáu.

El citáu acuerdu de la CUOTA, ye'l qu'el Tribunal de Xusticia d'Asturies declará non axustáu al orde xurídicu vixente n'aquel entós, colo que tol Plan Xeneral queda anuláu.

El Plan Urbanísticu del Conceyu Llanes entá tien una bona riestra recursos nos tribunales de la xusticia a instancies de AVALL (Agrupación de Vecinos y Amigos de Llanes).

El PSOE desixe de la direición del PP sofitu pa con les sos polítiques escontra l'asturianu.

El secretariu d'organización de la FSA-PSOE, Jesús Gutiérrez, dirixóse ayeri al PP pa que faiga pública la so postura pa cola oficialidá de la llingua d'Asturies al tiempu que rescampló la posición del PSOE a la escontra polo que la mesma supón d'obligación de l'alministración a protexela, conservala y da-y puxu.

Nel entamu ta la carta unviada per Gabino de Lorenzo, alcalde del Conceyu d'Uviéu, a Alvarez Areces na que facía comparanza del "cercu" que los gobiernos central y autonómicu tienen pa cola capital y el qu'el Gobiernu d'Asturies tien pa col asturianu.
(Amigu Vicente, espero que nun t'enfades porque escriba n'asturianu pues
fáigolo porque lo siento y tamién por solidaridá, porque la verdá ye
que-y tienes puesto un cercu tan altu como'l que sufrimos na capital
del Principáu que presides).Ver lne.

Paez que a dos meses escasos de les elleciones, y con tantu cercu, los socialistes principien a carecer de los nervios y ya güeyen un nuevu cercu, ésti de los ellectores pa coles sos candidatures.

La verdá ye que dende los tiempos de la dictadura enxamás se faló tanto n'Asturies de "represión" como entagora. Represión llingüistica, de manifestación, d'opinión. Multes, despidos, denuncies y detenciones, pieslle de medios de comunicación...

¿Va a ser la política llingüistica del PSOE el principiu del fin de los socialistes n'Asturies?. Va ser que sí. Hasta al so secretariu d'organización-y da llerza la perda de votos non ya a favor d' Izquierda Xunida-Bloque, Unidá Andecha-IAS o Unión Asturianista URAS-PAS que la habrá y muncho, sinon tamién con destín al PP; dicho por Jesús Gutiérrez. Ver lne.

Dende equí convidamos a tolos votantes socialistes a emigrar col so votu seya a onde seya, onde meyor s'atopen, en la seguranza que naide nun los va asonsañar nin nomalos lleendes urbanes.

El principiu del fin... sinon al tiempu.

Atopar a Nemo. La TPA fai anuncies, otros fan llabor.

PatataPiloto

Rossaleda Jazz Quartet Meyor Cantar n'Asturianu de los Premios de la Música

Rossaleda Jazz Quartet col so canciu Na fonte, fízose güei col Premiu al Meyor Cantar n'Asturianu de los Premios de la Música de l'Academia de les Artes y les Ciencies entregaos esta mesma nuechi nel Gran Teatru de Córdoba.

Foron finalistes dientro'l mesmu apartáu, Toli Morilla col so canciu Cuando naide lo ve y el Colectivu Músicos pola Oficialidá con Un Pasu Alantre, canciu producíu pola Xunta pola Defensa de la Llingua pal Día de les Lletres Asturianes del añu pasáu.

Joan Manuel Serrat foi galardonáu col Premiu al Meyor Cantar en Catalán-Valencián y a la hora de recoyer el premiu, refiriose a la pluralidá llingüistica del Estáu pa reivindicar que tamién los cancios en bascu, en gallegu y en catalán podieren participar nel palmarés de los premios mayores. Citó pol so nome a estes tres llingues escaeciendo dafechu l'asturianu, ensin que pasaren nin cinco menutos dende la recoyida del premiu al meyor cantar na llingua d'Asturies.

Barrunto que cuando vien a Asturies combidáu polos sos importantes collacios, nun-y enseñen dala cosa que de la ruta de les marisqueríes de Xixón. ¡Que pena!.

El conseyeru Valledor reclama al Gobiernu español drechos nel usu del asturianu.

Conseyeros de siete comunidaes autónomes coles trasferencies de la Xosticia trasferíes, ente les que s'atopa Asturies, reclamaron el pasáu vienres 16 en Compostela al gobiernu español, el drechu de los ciodadanos al usu del asturianu y de les demás llingues del Estáu nos procedimientos xudiciales.

Sigún Valledor, Conseyeru de Xosticia d'Asturies(Izquierda Xunida-Bloque por Asturies), "instóse a les estituciones con competencies de xosticia a que se garantice'l drechu de los ciodadanos de poder dirixise a los xulgaos ya tribunales na llingua que llibremente escueyan, sigún la normativa de ca comunidá autónoma y los sos planes de normalización llingüistica".

La falta d'oficialidá de la llingua asturiana nun ye torga, sigún Valledor, porque la Llei d'usu y la normativa autonómica obliga a la so proteición y difuxón. Tamién dixo que la Carta Européa de les Llingues Minorizaes reconoz estos drechos a los ciodadanos falantes de llingues que nun son oficiales pero que como l'asturianu tan amparaes per normes llegales autonómiques.

Nun ye la primer vegada que se tomen alcuerdos d'esti cálter referíos a l'alministración de xosticia o a otres estayes del poder políticu o llexislativu pero los réditos recuéyenlos el catalán, el gallegu y el bascu.

Los drechos de los ciodadanos d'Asturies al usu de la llingua propia zapicarán una vegada más escontra la rialidá de la falta de rangu oficial y esborrarálos testeronamente la mareona de la inorancia y el sectarismu intoleranti.
Y demientes la llingua nun seya oficial, Sr. Conseyeru, los asturianos nun podremos exercer los drechos democráticos d'usu de la llingua propia énte estamentos nin de la xosticia nin de res, nin nel estáu nin n'Asturies.
Asina y tóo, el so esfuerciu d'equí a algamar rangu d'oficialidá pal asturianu fáisenos amañosu.

Xuristes tachen a la Conseyera de la Presidencia d'actitúes fosques ya intolerantes

L'Aconceyamientu Xuristes pol Asturianu mantuvo una reunión el xueves día 15 en cuenta d'estudiar el casu de la negativa per parti de la Conseyería de la Presidencia de facer treslláu de los permisos mélicos solicitáos per Xurde Blanco, funcionariu del Seviciu Xurídicu de la mesma, per tar cursaos n'asturianu.
De la reuníon surdió el acuerdu de pidir la dimisión inmediata de la Conseyera de Presidencia María José RAMOS (PSOE), "pola so actitú fosca ya intolerante pa cola llingua asturiana y los funcionarios que fan empregu d'ella". Tamién piden la dimisión del Direutor Xeneral de Rellaciones Estitucionales y del Serviciu Xurídicu y del Xefe de Serviciu Xurídicu que foron los mandáos de la conseyera pa executar «les midíes de cálter discriminatoriu o represor».

Pela parti de l'Alministración, el Direutor Xeneral de Rellaciones Estitucionales y del Serviciu Xurídicu del principáu, Manuel CABALEIRO TEIJEIRO, fizo unes declaraciones nes qu'acusa al lletráu Xurde Blanco d' "unviar escritos n'asturianu nun intentu d'imponer l'usu desta llingua nel Serviciu". Tales declaraciones llamen l'atención cuanto más, al ser el Direutor Xeneral del Serviciu Xurídicu del principáu el que paez desconocer la llexislación alreor de la llingua tanto nel Estatutu d'Asturies, como na Llei d'usu del Asturianu asina como les distintes llexislaciones tanto del Estáu como de la Xunión Européa.

Espeyar tamién que ye esta Conseyería de Presidencia la más roceana al usu de la llingua poniendo-y torgues a la entrega d'ímpresos n'asturianu a los llicitadores nes contrataciones alministratives sigún obliga la Llei de Contratos de les Alministraciones Públiques. Tamién paez que pretendíen espublizar nel Boletín Oficial col so vieyu nome castiellanizáu, los nomes de llugar de pueblos y conceyos, nun respentando la llegalidá toponímica vixente güei.

¿Cuala ye la zuna que lleva a esta actitú predeterminada y fosca pa col nuesu patrimoniu?. La rempuesta tiénenla la llangreana Ramos y el so Direutor Xeneral de Rellaciones Estitucionales y del Serviciu Xurídicu, el gallegu Cabaleiro Teijeiro.

Fuelga xeneral pal xueves 22 nos estitutos d'Asturies

Mozos ya moces de los estitutos de toa Asturies tan llamaos a facer fuelga xeneral el xueves 22 de marzu POL DRECHU A ESTUDIAR N'ASTURIANU y escontra les medíes de la Conseyería d'Educación pa torgar esti drechu. La convocatoria ta entamada pola Xunta Moza col sofitu de Coleutivos de Mocedaes Comunistes (CMC), Mocedá d'Andecha Astur (MAA), Mocedá d'Izquierda Asturiana (MIAS), Xuventú Asturianista y Conceyu Universitariu pol Asturianu (CUPA). A les 12.00 del miudía fadrán una concentración delantre la sé de la conseyería na Plaza España d'Uviéu.

Enllaz: exunta.org

El Gobiernu d'Asturies ordena el pieslle d'un mediu de comunicación.

El viceconseyeru d'Alministraciónes Públiques, Luis Iturrioz (PSOE) unvió una carta al Direutor Xeneral de Retevisión, (sociedá concexonaria encargada de la emisión de les siñales televisives), na que ordena la sospensión de la siñal d'emisión de Teleasturias, cadena de televisión que nun consiguíó una frecuencia nel caberu consursu de llicencies de Televisión Dixital Terrestre (TDT).

Teleasturias sostién que la Llei de TDT permite a les emisores siguir seis meses más n'antena dende la resolución del concursu. el cualu otorgó el pasáu mes de xineru la única llicencia d'emisión d'ambetu autonómicu a la Productora Asturiana de Televisión, S.A. empresa venceyada col grupu de comunicación PRISA.

Ye xeneral la opinión qu'esti pieslle ye prematuru ya illegal polo que Teleasturias presentará querella criminal escontra el Presidente d'Asturies Vicente Alvarez Areces, el Conseyeru y el Viceconseyeru d'Alministraciones Públiques. Amás fan un llamáu a concentrase na Plaza La Escandalera d'Uviéu pa güei vienres a les 13.00 hores. Tamién paez que va haber concentraciones delantre les cases conceyu de toa Asturies.

Nun ye la primer vegada que dende un Gobiernu d'Asturies se tomen midies polítiques escontra medios de comunicación; nel añu 2001 un gobiernu socialista presidíu tamién per Vicente Alvarez Areces, retirába-y a Radio Sele, emisora en llingua asturiana, una llicencia d'emisión comercial llegalmente otorgada per un gobiernu anterior presidíu per Sergio Marqués. Daquella Radio Sele llevó el casu a los tribunales, que fallaron al so favor y a la restitución de la llicencia. La sentencia entagüei ta incumplida per parti'l gobiernu.

Nel casu de Teleasturias, ésta encuéntrase nuna situación "allegal" y nun sedría lo mesmo, lo que se dirime ye si esti "apagón" repentín, ensín dexar pasar los seis meses que marca la Llei de la Televisión Dixital Terrestre, nun se deberá a que Teleasturias ye un mediu críticu col gobiernu y a que les elleciones autonómiques y a conceyos son d'equi a tres meses y la so influencia fora dañible pal presidente y el so partíu.

Nun ye l'unicu problema, tamién tan les repercusiones del xuiciu de Morala y Carnero (CSI) que criminaliza les movilizaciones de la naval y per estenxón toos los conflictos llaborales, les denuncies escontra sindicalistes del SUATEA "per romper un cordón policial", cargues policiales descomanaes escontra los trabayaores de la sanidá, les denuncies y detenciones de contino escontra militantes o manifestantes asturianistes, l'intentu d'esborrar la llingua asturiana de los colexos, estitutos y hasta de la cái, les denuncies per "poner pegarates enes faroles de Llangréu", per pidir la oficialidá de la llingua, per manifestase.... "per insultar a l'autoridá"...

Y a too esto, na canal autonómica de televisión (TPA), nun se fala más que de xornaes gastronómiques, fiestes, "turistes que mos visiten" y demás caxigalines, o seya... EL PAIS FELIZ (El Presidente Areces y la Conseyera de Cultura Ana Migoya tienen vezu referise a Asturies como'l "Parque Temáticu").


Nun sé... "Estáu de sitiu". Película de Costa Gavras.