PODEMOS: 25.2% (6.522.000)
PP: 23.9% (6.185.000)
PSOE: 19.8% (5.124.000)
IU: 5.7% (1.475.000)
C’s: 4.7% (1.216.000)
UPyD: 3.8% (983.000)
ERC: 2.8% (725.000)
CiU: 2.7% (699.000)
VOX: 1.8% (466.000)
PNV: 1.3% (336.000)
AMAIUR: 1.2% (311.000)
COMPROMÍS: 0.8% (207.000)
EQUO: 0.7% (181.000)
CC: 0.7% (181.000)
BNG: 0.6% (155.000)
FAC: 0.3% (78.000)
GBAI: 0.2% (50.000)
PARTICIPACIÓN: 72.4% (26.230.000)
De magar dixe que'l gran qué del partíu Podemos foi saber dirixise a una masa de persones güérfanes d'oxetivu políticu: indignaos, desencantaos, descorazonaos, desilusionaos; y que lo fixo perbién; y que lo ta faciendo perbién; y que lo ta faciendo ensin apelar nin a les barricaes nin a la fuelga revolucionaria. Con un mensaxe directu, llanu, ensin utilizar complexos razonamientos financieros nin enrevesaos conceutos de teoría económica, que nin entienden nin interesen a los destinatarios de les sos palabres, supieron llegar a tolos rincones de la xeografía española … y non yá; un procesu que se reforzó cola creación de Ganemos y de Somos, y de los Círculos d'alderique. Absolutamente maxistral. Toi convencíu de que la estratexa de Podemos va ser estudiada nes clases de Derechu Políticu de mañana
Nel sieglu XIX faciendo lo dicho nel párrafu anterior fuera abondu, inclusive nos dos primeres décades del XX, pero güei nun lo ye porque güei la economía yá ye postglobal polo que tou tien o acaba teniendo implicaciones en tou, polo qu'a les coses hai que pone-y non yá nome sinón tamién apellíos y númberu de pasaporte y de tarxeta de pagu electrónicu.
Ayeri Podemos presentó les sos llínees económiques de la man de dos economistes auténticos pesos pesaos de lo que se dio en llamar ‘Economía Social’, los Dres. Vicenç Navarro y Juan Torres. Y son unes llínees que, tol mundu va tener que convenir, tienen coherencia. Enceten la tema de la delda, de la desigualdá, del créitu, de la fiscalidá.
Entá nun lleí tol programa pero aportuno na coherencia. Dende la mio conocencia parcial piensu que nun s'entra nel problemón qu'España tien cola so baxa productividá, tampoco nel modelu granible centráu nel baxu valor añedíu, nin nel escesu de capacidá granible d'un sector industrial con una bien escasa capitalización. Anque posiblemente eso dexénlo pa próximos desenvolvimientos.
Aportuno en que lo lleío ye coherente. Va Poder gustar más o menos, o nada n'absolutu, pero ye coherente. Anque en realidá lo único bramente importante ye que-y preste a Los Mercaos. Si a los Mercaos yos suenen bien los cantares de Podemos: les lletres y la música, van afarar porque'l so mensaxe yá caló y va siguir calando a midida que se vaya demostrando qu'esa "recuperación" de la que fai gala'l Gobiernu ye de papel y ta construyida sobre enagua, y a midida que los estándares de vida de la mayoría de los españoles vaigan degradándose; pero eso nun tien nenguna importancia: namái la tien que Los Mercaos atalanten que si deciden mercar el discu de Podemos nun van perder y va a ganase n'estabilidá.
Van entrugase si Los Mercaos pueden llegar a eses dos conclusiones, y yo pienso que sí: si vustés fueren parte de Los Mercaos, ¿nun roblaríen perder el 40% de lo que-yos deben, allongar el plazu del restu que-yos tienen que pagar, rebaxar los intereses de la delda viva, en cuenta d'años de tranquilidá y de tener posibilidaes de faer negocios col ente muncho más sanu que d'esa operación salga?.
Barrunto que Podemos pue ser un bien bon negociu pa Los Mercaos, claro qu'eso tienen que lo qu'acabar decidiendo ellos.
¿Cuánto vamos tardar en ver un Podemos-Francia o un Podemos-Alemaña?
Y el restu de políticos d'equí que digan lo que-yos paeza.
Santiago Niño-Becerra. Caderalgu d'Estructura Económica. IQS School of Management. Universidá Ramon Llull.
Compromisu por Asturies fae públicu’l so sofitu al proyeutu Somos Asturies dientro de Podemos.
Somos Asturies ye un proyeutu que, dientru de lo aprobao n’Asamblea “Sí se puede”, apuesta por afondar na horizontalidá nes decisiones, por caltener el protagonismu de los círculos y por alendar la participación de los movimientos sociales y de la ciudadanía na vida política.
Somos Asturies ye un apueste por una visión global d’Asturies que va más allá del localismu; qu’inclúi a l’Asturies rural como motor de cambéu económicu y social al par que l’Asturies urbana; una Asturies que pon en valor la so historia, a la so llingua o a la so cultura porque con elles siempre aporta y siempre suma; una Asturies que, como n’otres ocasiones, írguise con ilusión pa lluchar y recuperar la so vida y el so futuru.
Estos puntos de partida son coherentes y converxentes coles posiciones polítiques de Compromisu dende la so constitución y ye un marcu ideolóxicu nel que nos sentimos cómodes pa siguir trabayando pa da-y soberanía y xusticia social a los asturianos y asturianes.”
Enfrentámonos a un tiempu nuevu, de cambios, desafíos y ilusión. Esi cambiu tien d’empezar polo más cercano, polos nuestros conceyos. La construcción de candidatures municipales d’unidá popular ye’l primer pasu pa recuperar el pulsu de la cai y volver facer política cola xente y dende la xente. Nun mos conformamos con ser namás espacios de participación. Tenemos que conectar los conceyos y localidaes d’Asturies y dende ellos rebalsiar les instituciones pa devolveles a la ciudadanía.
Pero nun podemos conformanos con tresformar sólo les nuestres localidaes. Necesitamos mirar fuera y adoptar una perspectiva qu’abarque tol conxuntu. Ensin un proyectu asturianu non yá vamos perder eficacia, tamién vamos esbardiar la oportunidá d’influyir a nivel xeneral. Tenemos que construyir un PODEMOS que, dende Asturies, afonde en formes democrátiques de participación directa al traviés de formes responsables de facer política que sirvan d’exemplu nel conxuntu del territoriu:
PODEMOS tien equí la mayor implantación, el mayor porcentaxe de sofitu electoral y la mayor proporción d’inscritos del Estáu y, amás, pue algamar el so primer gobiernu autonómicu.
Asturies, una vegada más, encabezando’l cambiu, marcando’l camín.
LA ASTURIES QUE NAZ
Caldía espertamos con un nuevu escándalu de corrupción y tenémoslo más claro. Hai una Asturies que muerre: la Asturies de la corrupción, les cuentes en Suiza y les redes clientelares, la de Villa y la mafia políticu-sindical, la del Pactu la Zoreda y la vieya política, la del afuego al mundu rural.
Vivimos nuna permanente seca económica que se traduz nuna sangría demográfica. Fracasaron les polítiques pa la reconversión económica, y los fondos mineros, de formación, o de la UE fueron escalaos pel camín. Vémoslo en miles de millones d’euros gastaos n’infraestructures qu’agora son namás tumbes de formigón y nos más de 20.000 mozos asturianos emigraos dende l’empiezu de la crisis.
Pero tamién hai una Asturies que naz: la de les ciudadanes y ciudadanos llibres que decidimos facenos corresponsables de la política y recuperar la soberanía. Tamos viéndolo dende’l 15M: surdieron nueves formes de participación, organización y empoderamientu ciudadanu nes cais y nos barrios, nes asamblees y marees de trabayadores y d’estudiantes, o nos nuevos centros sociales. Porque tamos faciendo política poles nuestres vides, pa nun tener qu’emigrar, pa poder tener un trabayu dignu, pa poder formar una familia. PODEMOS convirtióse nuna pieza clave nel tableru políticu asturianu y una ferramienta de tola xente d’Asturies. Xugámonos muncho esti mes de mayu: son más qu’unes elecciones, son el primer pasu pa recuperar el nuestru presente y ganar el nuestru futuru. Ye la hora de gobernar pa la xente y dende la xente, la sorrisa ta camudando de bandu.
EL PROYECTU DE SOMOS ASTURIES
El proyectu SOMOS ASTURIES (y los sos axugos municipales) ye la forma de construcción de la iniciativa PODEMOS n’Asturies. A nivel organizativu, el modelu aprobáu na Asamblea Ciudadana de PODEMOS ye un paragües que dexa llibertá d’acción pa desendolcalu y complementalu nos territorios onde los círculos funcionen razonablemente bien. Los Conseyos Ciudadanos y Secretaríes Xenerales, si actúen con independencia de los círculos, cayeríen nes formes desilusionantes de la vieya política esbaratando la participación. Apostar pola participación ye l’antídotu contra aquellos qu’entienden l’acción política como una simple maniobra pa buscar un cargu: PODEMOS ta construyendo un proyectu, nun repitiendo estructures agotaes. Poro ye importante impulsar espacios pal alderique y l’intercambiu d’idees, como los Alcuentros Ciudadanos, y espacios de confluencia colos movimientos sociales, les Asamblees Sociales.
A nivel políticu, ye esencial salir a la cai a repitir que SÍ VAMOS TAR nes municipales. Porque queremos echar a la casta de los nuestros ayuntamientos y siguir trabayando pa tola ciudadanía. Vamos formar candidatures de la xente y pa la xente, candidatures de participación abierta, con un códigu éticu estrictu y en redol a un programa ciudadanu de construcción colectiva. La decisión nun podrá facese efectiva hasta’l 30 d’avientu, fecha na que remata’l procesu de estructuración municipal de PODEMOS. Hasta esa fecha tenemos qu’aldericar de cómo queremos que sían eses candidatures y poner en marcha la loxística. Paralelamente, precisamos una estructura coordinada ente los conceyos, con círculos enraigonaos na realidá de cada localidá, un grupu de trabayu estensu con capacidá técnica (audiovisual, diseñu, redes sociales, sofitu xurídicu, xente con conocencia fonda de la realidá social…) como elementu d’ayuda y apoyu mutuu en cada conceyu y con un proyectu municipal y autonómicu común dende’l que construyir un proyectu de vida pa la Asturies que naz. Caltener estes estructures abiertes y participatives vacúnanos del peligru de construyir un aparatu electoralista ensin capacidá política de tresformamientu de la realidá y que nos alloñaría de la xente y de la razón de ser de PODEMOS.
Con SOMOS tamos trabayando nel PODEMOS qu’imaxinamos y que necesitamos pa ganar. Frente a l’Asturies que muerre, con SOMOS tamos construyendo l’Asturies que naz.
La demanda n’aumentu de los colexos privaos sobvencionaos obedez a les diferencies sociales ente alumnos y families d’estos centros y los sos homólogos de los públicos. Eso amuesa un estudiu de dos espertos que camienten qu’esti problema va aumentar cola LOMCE.
David Artime / Periodista.
Un día abres La Nueva España y alcuentres una clasificación de colexos ya institutos según les notes medies de los sos alumnos, como si se tratara d’una competición deportiva. Los llectores fíxense nos meyores, probablemente munchos d’ellos concertaos, y tomen nota pa matricular a los sos fíos al añu siguiente.
Manuel Muñiz Pérez describe una hipotética situación análoga a ésta ente sorrises, tranquilamente, tomando un café nuna terraza d’El Carbayeo (Avilés). Pero l’asuntu nin lu tranquiliza nin tampoco-y fai gracia. Sabe de lo que fala, y non solo porque seya padre de dos alumnos de Primaria y miembru del so Conseyu Escolar, sinón porque amás ye profesor d’Economía de la Universidá d’Uviéu, especializáu n’Economía Aplicada a la Educación, y lleva 14 años faciendo estudios y publicando artículos sobre la eficiencia y la calidá educativa.
L’últimu apaeció va añu y mediu, y los sos ecos tovía resquemen en despachos universitarios y pasiellos docentes. Titulábase “Colegios concertados y selección de escuela en España: un círculo vicioso”. Firmábalu en xunto col tamién profesor y economista Roberto Llera na revista Presupuesto y Gasto Público, y les sos conclusiones, desgraciadamente, na so opinión, ponles de rabiosa actualidá la Llei Orgánica pa la Meyora de la Calidá Educativa (LOMCE), más conocida como “Llei Wert”.
“Nun hai igualdá de condiciones ente’l tipu d’alumnáu de los colexos públicos y de los concertaos y, por tanto, nun puen competir d’igual a igual”, señala Muñiz. Y ye precisamente esa palabra, “competir”, la madre’l corderu. Nel so títulu VIII, la LOMCE establez la realización de reválides esternes en cada fin de ciclu y la publicación de los resultaos de cada centru, los llamaos rankings. L’estudiu recueye que la ellaboración de clasificaciones de colexos a partir de resultaos de pruebes comunes ye una “demanda tradicional” de la concertada, pues alcontrámonos efectivamente con meyores resultaos en promediu nos colexos concertaos que nos centros públicos. Sicasí, el motivu nun ye, según esta investigación, una meyor calidá de la ufierta educativa concertada, sinón que les escueles públiques acepten un porcentaxe mayor d’alumnos con dificultaes del llinguaxe, necesidaes especiales o procedentes d’un entornu social menos aventayáu. “Nun pue comparase a un colexu con alumnos d’estracción social obrera con unu del centru d’Uviéu, onde munchos padres son médicos o abogaos”, matiza Muñiz.
Na so opinión, la realidá ye testerona y los datos ehí tán. “El 90% del alumnáu xitano ta en centros públicos”, exemplifica. Pero’l so trabayu ufierta otros datos. Na concertada asturiana, por casu, un 52,7% de los alumnos son fíos de padres con ingresos mensuales superiores a los 1.800 euros al mes, frente a un 29% na pública. Amás, el 64,7% de los padres de la concertada tien un oficiu cualificáu, un porcentaxe que baxa al 33,9% na pública. Otros datos señalen, ya a nivel de tol Estáu, que nos concertaos los padres con estudios universitarios son casi’l doble que na pública, onde malpenes superen el 20%. L’autor fai referencia a abondos analises que demuestren que, restando’l factor de diferenciación del entornu social de los alumnos, los resultaos académicos d’unos y otros son asemeyaos o hasta lixeramente superiores na pública.
Alerta que los meyores centros d’esos rankings van recibir más fondos, pero, amás, les llistes de puntuaciones van ser públiques “pa que los padres lo sepan”. Ehí ye onde ta’l gran “peligru” d’esti sistema de clasificaciones. Los númberos van atrayer a munchos proxenitores de la pública hacia la concertada y “nun va facer más qu’afondar na segregación social ente una y otra”. Esto nun ye nuevo. Ello ye que’l so estudiu yá reflexa un enclín favorable a los centros concertaos. Asina, ente 1990 y 2011, mientres l’aumentu d’unidaes en centros públicos en toa España foi d’un 30,4%, na privada y concertada foi d’un 45%.
Nesti momentu, hai un 68,3% d’unidaes na pública y un 31,7% na privada y concertada, diferencia que según Muñiz tiende a amenorgase. Ello ye que baxa en Comunidaes gobernaes pol PP y el casu más claru ye’l de la de Madrid, onde les unidaes de privada y concertada en 2011 yá yeren el 48%. Casu contrariu sería’l de llugares como Estremadura (18,2%), Castiella La Mancha (17,6%) o Asturies (26%), toes elles naquel momentu gobernaes pol Partíu Socialista. Y too ello nótase nel gastu: el porcentaxe de presupuestu público non financiero pa educación non universitario destinao a conciertos y sobvenciones de la escuela privada aumentó d’un 12,77% en 1992 a un 15,97% nel 2009 a nivel estatal.
L’“efectu compañeros”
El creciente enclín hacia la concertada de munchos padres nun ye, según plantega l’estudiu, porque seya meyor, sinón por otres dos razones: de primeres, porque alumnos que s’arrodien en clase de compañeros que saquen bones notes y permiten un trabayu prestosu van tener más posibilidaes d’éxitu educativo, lo qu’él denomina “efectu compañeros”; y en segundu, porque “les redes sociales y de contactos personales que creen los mozos na escuela colos sos compañeros (y les sos families respectives ente sí) van afectar a la so futura posición cultural y socioeconómica. Influencia que pue ser positiva (si falamos de compañeros de bona posición social o de padres de mediu altu nivel cultural) o negativa (si consideramos como futuros compañeros a mozos que provengan de colectivos desfavorecíos, con problemes de deprendimientu o families de baxu nivel socioeconómico y cultural)”, cita’l so estudiu. Na so opinión, la publicación de les clasificaciones de centros que plantega la LOMCE va valir p’agravar esta situación.
Pero nun son los rankings l’únicu aspectu que beneficiaría a la concertada, según l’investigador. Otru sería la implantación de la relixón como asignatura evaluable, dao que les trés cuartes partes de los privaos y concertaos qu’hai n’España son relixosos. Diz que comentó en dellos congresos internacionales a colegues alemanes o suecos que n’España la relixón va puntuar lo mesmo que matemátiques “y echáronse a rir”. Anque la situación actual, antes de la llei, tampoco ye del so gustu: “A los mios fíos, como nun dan relixón, a la hora d’esta asignatura oblíguenlos a xugar al parchís, porque si aprovechen la hora pa enseña-yos daqué, anque nun seyan conteníos curriculares, entiéndese que se ta discriminando a los que sí dan relixón”.
Tamién señala la cláusula sobre la cesión de suelu público en condiciones favorables pa la implantación de colexos concertaos de nueva creación, “anque haiga places públiques”; el “blindaxe” de los colexos que segreguen por xéneros, o l’ampliación del plazu de renovación de conciertos de 4 a 6 años. Y, a lo último, un detalle, non de la LOMCE, por ser de competencia autonómica, pero que defende a ultranza’l Partíu Popular, n’Asturies concretamente al traviés de la so diputada autonómica Susana López Ares, firme partidaria d’ello: el llamáu distritu únicu, esto ye, la famosa llibertá d’elección de centru.
Será’l centru’l qu’escueya al alumnu
Ye lo qu’a lo último diba facer posible, dende’l puntu de vista de Muñiz, que mientres dellos centros nun cubran places, otros, principalmente concertaos, tendríen escesu de demanda. ¿Y qué pasa cuando hai escesu de demanda? El profesor tiénlo claro: “El qu’acaba escoyendo nun ye’l padre, sinón el centru”; y anque nun sería llegal, recurre a un vieyu refrán español pa esplicase: “Fecha la llei, fecha la trampa”. Exemplifica con dellos casos de centros que conoz y, anque nun da nomes, oyéndolos nun resulta difícil imaxinar xerséis con escudu bordáu y crucifixos enriba l’enceráu. “A lo meyor, cuando vas matricular al to fíu, dícente que ye gratis, pero que’l serviciu de tresporte tienes que pagalu porque ye obligatoriu, anque vives a cien metros. N’otru, puen persuadite pa que deas un donativu, porque anque nun seyan obligatoriu tolos padres lu dan”.
El so estudiu acaba demandando que l’Alministración Pública defenda “la igualdá plena nel accesu a tolos centros calteníos con fondos públicos”. Pero l’Alministración Pública estatal lo que fizo ye una llei que, pa esti profesor, “ye una chambonada, tremada de parches ideolóxicos” y que beneficia a la enseñanza privada y concertada.
Pero la realidá vuelve ser testerona. Basta con tirar d’hemeroteca p’alcontrar noticies del presidente patronal de la concertada, CECE, Antonio Rodríguez-Campra, criticando numberosos aspectos de la LOMCE, como carencies na financiación o la non xeneralización del distritu únicu. Muñiz, sicasí, nun lo cree del too: “A nengún colexu concertáu lu obliguen a ser concertáu. Si lo son, ye porque-yos interesa”. Y lo cierto ye que, tirando un poco más d’hemeroteca, vuelve salir Rodríguez-Campra, diciendo que la LOMCE ye necesaria, que nun tendría qu’haber otra reforma dempués y que, anque nun ye la reforma qu’él fairía, “ye meyor que les anteriores”. Igual tamién se-y pue aplicar al líder de CECE otru vieyu refrán español: “Nun muerdas la mano que te da de comer”.
ESPUBLIZAO N'ATLÁNTICA XXII N. 34, SETIEMBRE 2014
El Manifiestu
(in English)(em português)(in Deutsch)(en français)(in italiano)(στα ελληνικά)(en català)(en galego)(euskeraz)(en Esperanto)
«Última llamada»
Esto ye más qu’una crisis económica y de réxime: ye una crisis de civilización
Los ciudadanos y ciudadanes europeos, na so gran mayoría, asumen la idea de que la sociedá de consumu actual puede “ameyorar” escontra’l futuru (y que tendría de faelo). Mentanto, bona parte de los habitantes del planeta esperen dir averándose a los nuesos niveles de bienestar material. Sicasí, el nivel de producción y consumu consiguióse a cuenta de escosar los recursos naturales y enerxéticos, y romper los equilibrios ecolóxicos de la Tierra.
Nada d’esto ye nuevu. Les investigadores y los científicos más lúcidos lleven dándonos fundaes señales d’alarma dende principios de los años setenta del sieglu XX: de prosiguir colos enclinos de crecedera vixentes (económicu, demográficu, nel usu de recursos, xeneración de contaminantes y medría de desigualdaes) la resultancia más probable pal sieglu XXI ye un colapsu civilizatorio.
Güei atrópense les noticies qu’indiquen que la vía de la crecedera ye yá un xenocidiu a cámara lenta. El cayente na disponibilidad d’enerxía barata, los escenarios catastróficos del cambéu climáticu y les tensiones geopolítiques polos recursos amuesen que los enclinos de progresu del pasáu tán quebrándose.
Frente a esti desafíu nun basten los mantras cosméticos del desenvolvimientu sostenible, nin el meru apueste por tecnoloxíes ecoeficientes, nin una supuesta “economía verde” que tapa la mercantilización xeneralizada de bienes naturales y servicios ecosistémicos. Les soluciones tecnolóxiques, tantu a la crisis ambiental como al cayente enerxéticu, son insuficientes. Amás, la crisis ecolóxica nun ye una tema parcial sinón que determina tolos aspeutos de la sociedá: alimentación, tresporte, industria, urbanización, conflictos bélicos… Trátase, a última hora, de la base de la nuesa economía y de les nueses vides.
Tamos atrapaos na dinámica perversa d’una civilización que si nun crece nun funciona, y si crez destrúi les bases natural que la faen posible. La nuesa cultura, tecnólatra y mercadólatra, escaez que somos, de raigañu, dependientes de los ecosistemes ya interdependientes.
La sociedá productivista y consumista nun puede ser sofitada pol planeta. Precisamos construyir una nueva civilización capaz d’asegurar una vida digna a una enorme población humana (güei más de 7.200 millones), entá creciente, qu’habita un mundu de recursos menguantes. Pa ello van ser necesarios cambeos radicales nes maneres de vida, les formes de producción, el diseñu de les ciudaes y l’organización territorial: y sobremanera nos valores qu’emponen tou lo anterior. Precisamos una sociedá que tenga como oxetivu recuperar l’equilibriu cola biosfera, y utilice la investigación, la tecnoloxía, la cultura, la economía y la política p’avanzar escontra esi fin. Vamos Precisar pa ello tola imaxinación política, arrogancia moral y creatividá técnica que llogremos esplegar.
Pero esti Gran Tresformamientu atopa con dos torgues titánicos: la inercia de la manera de vida capitalista y los intereses de los grupos privilexaos. Pa evitar el caos y la barbarie escontra onde güei tamos dirixiéndonos, precisamos una rotura política fonda cola hexemonía vixente, y una economía que tenga como fin el prestu de necesidaes sociales dientro de les llendes qu’impon la biosfera, y non la medría del beneficiu priváu.
Por suerte, cada vez más xente ta reaccionando ante los intentos de les elites de fae-yos pagar los platos rotos. Güei, nel Estáu español, l’espertar de dignidá y democracia que supunxo’l 15M (dende la primavera de 2011) ta xestando un procesu constituyente qu’abre posibilidaes pa otres formes d’organización social.
Sicasí, ye fundamental que los proyectos alternativos tomen conciencia de les implicaciones que suponen les llendes de la crecedera y diseñen propuestes de cambéu muncho más coraxosos. La crisis de réxime y la crisis económica namá podrán superase si coles mesmes supérase la crisis ecolóxica. Nesti sentíu, nun basten polítiques que vuelvan a les recetes del capitalismu keynesiano. Estes polítiques lleváronnos, nos decenios que siguieron a la segunda guerra mundial, a un ciclu d’espansión que nos asitió nel estragal de les llendes del planeta. Un nuevu ciclu d’espansión ye invidable: nun hai base material, nin espaciu ecolóxicu y recursos naturales que pudieren sofitalo.
El sieglu XXI va ser el sieglu más decisivu de la hestoria de la humanidá. Va Suponer una gran prueba pa toles cultures y sociedaes, y pa la especie nel so conxuntu. Una prueba onde se dirimirá la nuesa continuidá na Tierra y la posibilidá de llamar “humana” a la vida que síamos capaces d’entamar dempués. Tenemos ante nós el retu d’un tresformamientu de calibre análogu al de grandes acontecimientos históricos como la revolución neolítica o la revolución industrial.
Atención: la ventana d’oportunidá ta cerrándose. Ye ciertu qu’hai munchos movimientos de resistencia alredor del mundu en pro de la xusticia ambiental (la organización Global Witness rexistró casi mil ambientalistas muertos namá nos últimos diez años, nes sos lluches contra proyectos mineros o petroleros, defendiendo les sos tierres y les sos agües). Pero a lo sumo tenemos un llustru p’asitiar un alderique amplio y tresversal sobre les llendes de la crecedera, y pa construyir democráticamente alternatives ecolóxiques y enerxétiques que sían al empar rigoroses y vidables. Tendríamos de ser capaces de ganar grandes mayoríes pa un cambéu de modelu económicu, enerxéticu, social y cultural. Amás de combatir les inxusticies aniciaes pol exerciciu de la dominación y l’acumuladura de riqueza, falamos d’un modelu qu’asuma la realidá, faiga les paces cola naturaleza y faiga posible la vida bona dientro de les llendes ecolóxiques de la Tierra.
Una civilización acábase y hemos de construyir otra nueva. Les consecuencies de nun faer nada —o faer demasiao pocu— llévennos directamente al colapsu social, económicu y ecolóxicu. Pero si empezamos güei, inda podemos ser les y los protagonistes d’una sociedá solidaria, democrática y en paz col planeta.
— En diversos llugares de la Península Ibérica, Baleares, Canaries, Ceuta y Melilla, y nel branu de 2014
Ilustración de El Roto
Descarga el Manifiesto
Manifiesto Última llamada (PDF)
Algunos firmantes del manifiesto:
Ada Colau, Alberto Garzón, Antonio Turiel, Antonio Valero, Arcadi Oliveres, Belén Gopegui, Cayo Lara, Enric Duran, Esther Vivas, Ferrán Puig Vilar, Florent Marcellesi, Joan Herrera, Joan Martínez Alier, Joaquín Araujo, José Manuel Naredo, Juan Diego Botto, Juantxo López de Uralde, Justa Montero, Marina Albiol, Olga Rodríguez, Pablo Iglesias Turrión, Teresa Forcades, Teresa Rodríguez, Xosé Manuel Beiras, Yayo Herrero… (Ver lista completa al pie de la cual podrás firmar tú también)
(Traducción: Paco Ramos.)
Nesta primer xunta del Conseyu de Coordinación, la Executiva de PODEMOS, valoró la cuestión y organización territorial del Estáu nos términos que bien lluéu desplicó el Secretariu Políticu de la organización Iñigo Errejón.
Nel alderique territorial, PODEMOS proponse ser la única fuerza que "puede reconstruyir pontes", defende qu'España ye un Estáu plurinacional nel qu'el "pegamento" fundamental ye l'apertura d'un pactu, la seducción y la llibre voluntá, y apueste pol derechu a decidir, non yá sobre'l modelu territorial, sinón sobremanera l'orde políticu del 78 al traviés d'un procesu constituyente.
"Lo que toca ye devolver la palabra al pueblu" y que la xente decida la forma de relacionase ente los territorios, sorrayó Errejón.
Dotra miente, el Conseyu Ciudadanu de PODEMOS, el muérganu cimeru de direición política del partíu, va aconceyar el próximu 29 payares na so próxima xunta, na que los asuntos prioritarios van ser el programa económicu contra la crisis, la cuestión territorial y l'apertura d'un ciclu nuevu tres l'escosamientu del marcu constitucional", según esplicó'l so secretariu políticu.
Pablo Iglesias, Secretariu Xeneral de PODEMOS, amosóse "fartu" d'una concepción d'España "agresiva" que diz a caúnu qué idioma tien de falar. "España ye un país de naciones, por eso apostamos por un procesu constituyente que dexe abrir el candáu del 78'.
