13/8/07

"La eliminación de la llingua asturiana ye una prioridá inaplazable pal nuevu gobiernu d'Areces"



Comunicáu de la Xunta pola Defensa de la Llingua Asturiana:

El Gobiernu asturianu estrénase faciendo desapaecer la llingua asturiana de los pocos rótulos oficiales de les conseyeríes onde taba presente. Esto ye una declaración d’intenciones contundente que demuestra que la eliminación de la llingua asturiana ye una prioridá inaplazable pal nuevu gobiernu d’Areces.

La Xunta pola Defensa de la Llingua Asturiana quier denunciar l’actitú hipócrita de los representantes políticos d’esti gobiernu, qu’en declaraciones a los medios dicen que tán a favor de la protección del asturianu al tiempu que na so acción de gobiernu amuesen síntomes d’alerxa patolóxica énte la presencia de la llingua asturiana. Da-yos perceguera l’asturianu y nun son a disimulalo.

Con estes actuaciones queda más claro entá que’l discursu anti-oficialidá d’esti executivu nun ye otru que la plasmación política de los sos prexuicios y el so apueste por mantener la marxinación del asturianu y la falta de derechos llingüísticos pa les persones que lo falen.

11/8/07

Les primeres midíes del nuevu gobiernu socialista: esborrar tou rastru d'asturianu dexáu per Izquierda Xunida.


Semeya: Antigua sala de prensa de la Conseyería de Xusticia anantia del desmantelamientu fechu polos socialistes.

Los cartelos n'asturianu de "Gobiernu del Principáu d'Asturies" que llucíen les sales de prensa de la Conseyería de Bientar Social y la de Xusticia (agora Direición Xeneral dependiente de Presidencia), foron camudaos por otros escritos en español d'España pa que nun hobiere duldes de cuala ye la llingua oficial única d'esta Comunidá Autónoma.

Les dos conseyeríes taben rexíes na anterior llexislatura per Izquierda Xunida-Bloque por Asturies. El cambiu tien llugar al facese cargu de la Conseyería de Presidencia el tándem María José Ramos-Manuel Cabaleiro Teijeiro.

El consabíu cantarín de los socialistes de "la nuesa llende ye la oficialidá", amuésase una gran mentira, una más de los heriedes de Pablo Iglesias qu'arrasarán con cualquier cosa que pinte n'asturianu nes conseyeríes, en Bomberos d'Asturies, na Axencia Asturiana de Cooperación al Desarrollu, na d'Emigración, o nel Tribunal Superior de Xusticia, anque nun tenga un res que ver cola oficialidá (como un simple cartelu llantáu nuna muria). Orde directa de Presidencia: nin cartelos, nin esloganes, nin plaques, nin anuncies. A los socialistes molesta-yos l'asturianu, sácalos de quiciu, incomódalos, da-yos llercia, amedránalos.

Esta medrana (ente xente sectario ya acomplexáo), tien por vezu trasmítese al traviés de los llazos d'interdependencia económica qu'el poder xenera y pue tener consecuencies devastadores: primero camudar, lluéu quemar y si se tercia, ¿......?.

Quien entama una quema llibros, acaba quemando homes.
Heinrich Heine.

3/8/07

Televisión Española emitirá p'Asturies en catalán, bascu y gallegu.



Televisión Española va emitir al traviés d'una de les sos canales dixitales programes dafechamente fechos en gallegu, catalán y bascu. N'Asturies, lo mesmo que'n tol estáu, van poder sintonizase programes en castellán, gallegu, bascu y catalán, pero non n'asturianu.

Esto ye lo que refirió'n
Catalunya Ràdio el conseyeru de cultura de la Xeneralidá de Cataluña, Joan Manuel Tresseras qu'afitó el compromisu del ministru de cultura del gobiernu español César Antonio Molina pa coles llingues de gallegos, catalanes y bascos.

Una vegada más, la discriminación de la llingua asturiana y de tol Pueblu d'Asturies debiera facemos pensar que facemos de paganos nun Estáu español nel que tamos de "peleles", onde los drechos de los demás son sagráos y los de nueso nun nos son d'aplicación porque n'Asturies, y sólo n'Asturies, "tienen componentes d'obligatoriedá".

Sedría desixible del Gobiernu d'Asturies, de dellos partíos políticos, sindicatos, de les instancies xudiciales y de los medios de comunicación, que camudaren la so actitú feble y combayona pa colos ataques a la llingua d'esti Pueblu y a los sos falantes y aperiaren les midíes económiques y llegales necesaries pa que los drechos sociales, políticos, llingüisticos, les midíes d'igualdá y llibertá, ampararen tamién a los habitantes d'esta Comunidá Autónoma, trenta años dempués d'aprobada una Constitución que n'Asturies nun se cumple y venti-cincu d'un Estatutu probe y fechu a la midida d'una clas política social y culturalmente avieyada, gris y ramplona, lastrada polos años de dictadura ya incapaz de desprendese del mugre cultural qu'arrecendía del antiguu réxime, de la provincia y de la "sección femenina", autoproclamaos xestores de parque temáticu, cobradores d'un salariu que supera con muncho la llabor que desendolquen y el que teníin o nun teníin ya que la inmensa mayoría son burócrates de partíu, lliberaos de por vida, progresistes de salón, resabiaos caciquinos desertores del aráu, charranes de caleya, viendedores de falsos fitos y referencies, rellambíos aduladores de cetros, propagadores del tópicu, culturetes provincianos, figurinos de zarzuela qu'en pallabres d'un representante de la patronal, "na empresa privada nun pasaríin de los quince díes de preba".



2/8/07

Arranca'l Festival Intercélticu Lorient 2007



Vidiu: Banda Gaites Llacín. Nueche Máxica, Lorient-2006

Ente los díes 3 al 12 d'agostu va cellebrase'n la ciodá de Lorient en la Bretaña, el Festival Intercélticu 2007 qu'esti añu tará dedicáu a Escocia.


La Gran Parada de les Naciones Celtes, el Troféu de Gaita MacCrimmon, les Nueches dedicáes a les Naciones Celtes (la d'Asturies, xunta Irlanda sedrá el llunes 6 d'agostu) , van aconceyar a lo más curioso del mundu celta no referente a música, folclor, bailles y dancies, arte y cultura.

La representación d'Asturies tará conformada por Tejedor, Corquiéu, DRD, D'escarpinos y la Banda Gaites de Mieres.
Rubén Alba
, Marco Guardado, Pablo Carrera y Hugo Noval van ser los representantes nacionales nel Troféu MacCrimmon.
"Identidá y memoria nes artes d'Asturies, (1995-2007)", espeyará la identidá d'Asturies como pueblu al traviés de los güeyos y les manes de los artistes Fernando Alba, Anxel Nava, Astur Paredes, Pablo Armesto, Alberto Vázquez, Charo Cimas, Adolfo Manzano, Piru de la Puente, Noé Baranda, Pablo Maojo, Hugo O'Donnell, Adelaida Ovana, y María Jesús Rodríguez, que presenten la so obra nel Salón d'Arte Contemporaniu dientro de l'amuesa "Euro Celtic Art Pays Celtes"

Figures internacionales como Capercaillie o Sinéad O’Connor tamién se sumen esti añu al mas señeru de los festeyos de la Europa del Atlánticu.

El Festival tará dirixíu per primer vegada pol que foi direutor hasta'l añu pasáu de la delegación asturiana, Lisardo Lombardía.